«Буряадай балет. Шэнэ нэрэнүүд»

Энэ хэмжээндэ Буряадай оперо болон баледэй театрай одод Харука Ямада, Эрдэм Сандаков гэгшэд хабаадажа, олоной һайшаалда хүртэһэн байна.

Гол шанда хүртэхын түлөө Ород Уласай түрүү театрнуудай артистнар тулалдажа, иимэ дүнгүүд гаргагдаба.

«Эрхим балерина» шанда Мариинска театрай Мария Хорева хүртэбэ. Воронеж хотын театрай Елизавета Корнеева болон Иван Негробов хоёр «Эрхим хатаршад» гэжэ нэрлэгдэбэ. Эрэшүүлэй дунда «Эрхим хатаршан» гэһэн нэрэ зэргэ энэ жэлдэ хэндэшье олгуулагдабагүй.

Ород Уласай түрүү артистнарһаа бүридэһэн жюри иимэ дүнгүүдые баталжа, олоной урма хухалба.

Харука ЯМАДА:

Харалганай дүнгүүдые мэдэбэшье, би ехээр голхорногүйб. Теледамжуулгада хабаадаха гээшэ тиимэшье хүнгэн хэрэг бэшэ. Тиин иимэ үндэр хэмжээнтэй харалганда хабаадажа, дүршэлтэй болобоб. Энээн тухай һанамжа досоомни хото хадуугдажа байха".

Эрдэм САНДАКОВ:

 Эндэ хабаадахаяа ошоһон хүн бүхэн амжалта туйлахаб гэжэ найдаа. Тиин ондоо театрнуудай эрхим хатаршадтай танилсажа, дүй дүршэлөөрөө андалдаха хэрэг – ямаршье юумэнһээ сэнтэй. Буряадай артистнарые дэмжэжэ, манда һанаа зобожо байһан хараашадта баярые хүргэнэбди».

2021 оной январиин 10-да Буряадай оперо болон баледэй театр «Буряадай балет. Шэнэ нэрэнүүд» гэһэн концерт харуулха түсэбтэй. Эндэ манай бэлигтэй Харука Ямада, Эрдэм Сандаков  гэгшэд болон бусад одод хабаадалсаха гээд дуулганабди.