​«Һолонго» гэһэн хүүгэдтэ зорюулагдаһан ном Буряадта хэблэгдэбэ

«Алтан гэрэл» гэһэн үндэһэн заншалаа хүгжөөлгын жаса эдир уншагшадта зорюулагдаһан шэнэ ном хэблэжэ гаргаба.  «Һолонго» гэжэ нэрлэгдэһэн номой авторнууд буряад зурагай аргаар сэсэрлигэй хүүгэдые түрэл хэлэндэнь һургаха гол зорилго табиһан байна. Хорин дүрбэн хуудаһатай, ялагар талагар үнгөөр будагдаһан ном гартаа барижа байхада, бүдүүн зонойшье һонирхоод, иража эхилхээр гээд тэмдэглэлтэй.

Шэнэ номтой танилсуулга Буряад Уласай үндэһэтэнэй номой санда үнгэргэгдэжэ, хэблэлһээ һаяхана гараһан түрүүшын номууд хүүгэдэй сэсэрлигүүдтэ дамжуулагдаба. Харин мүнөө энэ ном зохёожо бүтээһэн уладууд тухай хэдэн үгэ хэлэлтэй. Ивалгын дасанай ахамад зураашан Чимит лама Доржиев энэ ном буряад зурагуудаар  шэмэглэн гоёожо үгэһэн байна.

- Багахан балшар хүүгэдэй анхарал дура татахын тула буряад зурагайнгаа арга боломжонуудые энэ номдо хэрэглээб. Монгол туургата арадайнгаа анханай һэеы гэрэй байдал, табан хуушуун малай дүрсэнүүдые, буряад эхэнэрэй хубсаһа хунар, зүүдхэлнүүд болон хээ угалзануудые элбэгээр хэрэглэһэн байнабди. Минии һанахада зохидхон, эдир уншагшадтамнай һонирхолтой, тэдэнэй багшанарта аша туһатай ном хэблэгдээ гэжэ һананаб, – гээд, Чимит лама һанамжаараа хубаалдана.

- Гүлмэрхэн наһандаа ябаһан сэсэрлигэй хүүгэд оршон тойронхи байдалаа һаял үзэжэ, танижа эхилжэ байна ха юм. Энэл үедэ тэдэниие түрэл хэлэндэнь, үндэһэн ёһо заншалнуудтань һургаха хэрэгтэй. Түрүүшынгээ ном гартаа барижа, элдэб үнгын шэрэ будагаар зуража байхадаа, хүүгэдэй ухаан бодолдо энэ мэдээнүүдынь һайнаар хадуугдадаг ха юм, – гэжэ энэ номой автор Оюнтуяа Алымбаева тэмдэглэнэ.

Энэ ном Буряад Уласай Толгойлогшын захиргаанай туһаламжаар хэблэгдэбэ.