​Буряад Уласта «Һээр шаалганай дуун» гэһэн клип буулгагдаа

Дугарма Цыреновагай гүйсэдхэһэн «Һээр шаалганай дуунда» Буряад Уласта клип буулгагдаа. Энэ түсэл «Буряад Уласта буряад хэлэ сахин хүгжөөлгэ» гэһэн программын хэмжээндэ бэелүүлэгдээ.

Клипэй буулгабари хадаа Дугарма Цыреновада зохёохы ажалай ёһотой һайндэр боложо үгөө.

- Энэ клип соо арадай ёһо заншал, тамирай үндэһэн наадануудай гүн удха, Буряадаймнай болон Үбэр Байгалай хизаарай тамиршадай хүсэ шадал харуулагдаа, - гэжэ залуу душан тэмдэглэбэ.

Клип буулгаха хэрэгтэ хабаадалсаһан Буряад Уласай соёлой яаманда, П.И. Чайковскийн нэрэмжэтэй Урлалай колледждо Дугарма Цыренова баяраа мэдүүлнэ. Тиихэдэ түсэлдэ оролсоһон зүжэгшэд Баир Лосолма Протасовуудта болон тэдэнэй Барас, Арсалан, Ирвэс хүбүүдтэ, оршуулагша  Дарим Жигжитовна Очировада, Улаан-Үдэ хотын зүблэлэй һунгамал Василий Цыремпиловтэ, Сергей Дружинин, Сергей Швецов видеооператорнуудта, дуунай аранжировко хэһэн Алагуй Егоровто залуу дуушан баяр хүргэнэ.

Түсэлэй хүтэлбэрилэгшэ: Баир Турбянов

Уран һайханай хүтэлбэрилэгшэ: Александр Саможапов

Дуунай ба хүгжэмэй автор: Дугарма Цыренова

Аранжировко, абяа буулгалга болон бүридхэл: Алагуй Егоров