​Буряадай Кабанскын аймагай Хандала нютагта соёлой байшан нээгдэбэ

Буряад Уласай Кабанскын аймагай Хандала нютагай соёлой байшанда долоон сая түхэригэй заһабарилга хэгдэжэ, мүнөөдэр нээлгын баяр ёһолол үнгэргэгдэбэ. Хандалын соёлой байшан «Комплексное развитие сельских территорий» гэһэн гүрэнэй программада оруулагдаһан түрүүшын эмхинүүдэй нэгэн болоно.

Соёлой байшан аяар 1968 ондо баригдажа, тэрэ гэһээр ехэ заһабарилга эндэ хэгдээгүй. Энэ эмхиин хүдэлмэрилэгшэд лэ шэрдэжэ, будажа байгаа.

Мүнөө соёлой байшанай фундамент бүхэлэгдэжэ, хушалта, сонхо, үүдэн, гэшхүүр шала шэнэлэгдээ. Дулаасуулга, зайн галай һужаанууд һэльбэн шэнэлэгдээ. Тиихэдэ энэ программын хэмжээндэ соёлой байшан Газель NEXT А65 R52 түхэлэй унаатай болоо.