​Буряадай уран зураашан Зорикто Доржиевай үзэсхэлэн Москвада дэлгэгдэхэ

Москва хотын Artplay түбэй Ханхалаевай галерейдэ январиин 21-һээ мартын 14 болотор дэлхэйдэ мэдээжэ уран зураашан Зорикто Доржиевай үзэсхэлэн дэлгэгдэхэ. Уран зураашын шэнэ бүтээлнүүдшье олоной һонорто дурадхагдаха.

Энэ түсэл «XXI» гэһэн нэрэтэй. Һонирхолтойнь гэхэдэ, Сагаалганһаа 21 үдэр урид, XXI-дэхи зуун жэлэй 2021 оной январиин 21-дэ, Ханхалаевай галерейн байгуулагдаһаар 21-дэхи жэлдэ үзэсхэлэн дэлгэгдэнэ.

Январиин 21-дэ Ханхалаевай галерейдэ Зорикто Доржиевай уран бүтээлнүүдые харахаһаа гадна, уран зураашантай уулзажа хөөрэлдэхөөр юм.