​Буряадай соёл уралигай колледж байгуулагдаһаар 90 жэлэйнгээ ойн баяр тэмдэглэхэнь

Январиин 30-да П.И. Чайковскиин нэрэмжэтэ соёл уралигай колледж байгуулагдаһаар 90 жэлэйнгээ ойн баяраа угтана. Үнгэрһэн зуун жэлэй гушаад онуудһаа колледжын түүхэ эхилнэ. 1931 оной январиин 30-да Буряад-Монголой соёл-уралигай техникум байгуулагдаа. 1936 ондо тэрэ Буряад-Монголой хүгжэмэй-театрай училищи болоһон юм. Эрдэмэй гуламта дүүргэһэн шабинарай тоодо Буряадай мэдээжэ композиторнууд – СССР-эй арадай артист Бау Ямпилов, СССР-эй соёлой габьяата хүдэлмэрилэгшэ Жигжит Батуев, Буряадай арадай артист Дандар Аюшеев гэгшэд.

Буряадай уласай соёл уралигай колледждэ 2021 жэлэй туршада баярай хэмжээ ябуулганууд эмхидхэгдэхэ. Эпидемиологическа байдалай тэгшэрээ һаань, Виктор Усович, Базыр Цырендашиевай тоглолтонууд болон Сергей Манжигеевэй дурасхаалда зорюулагдаһан тоглолто түсэблэгдэнхэй. Апрель һарада колледжын зохёохы бүлэгүүдэй тоглолтонууд үнгэрхэ гэжэ түсэблэгдэнхэй.