556
«Буряад Уласай үзэсхэлэнтэ 100 газар» гэһэн мүрысөөнэй һанал хуряалгын дүнгүүд согсологдоо. Уласайманай ажаһуугшад эгээл һонирхолтой газарнуудые шэлэһэн байна.
Буряад Уласай аймагууд болон ажаһуугшадһаа мүрысөөндэ хабаадаха тухай мэдүүлгэнүүд долоон неделиин туршада оруулагдаа. Һанал хуряалга 2021 оной январиин 21-һээ февралиин 4 болотор эмхидхэгдээ.
Тиигэжэ һанал хуряалгын дүнгүүдээр Кабанскын аймагай элһэн эрьетэй Дулаан гэһэн газар түрүүлээ. Тэрэнэй түлөө 14 849 дуун үгтөө. Хоёрдохи һуурида Сэлэнгын аймагай Загустайн дасан гараа, тэрэнэй түлөө 14 757 ажаһуугшад дуугаа үгөө. Бабушкин хотын Маяк гурбадахи һуури эзэлээ, тэрэнэй түлөө 8094 хүн һунгаа.
«Манай уласта байгаалиин болон гараар бүтээһэн үзэсхэлэн газарнуудаар, түүхэ болон ёһо заншалнуудааршье гайхуулма баян. Буддын шажанай болон үнэн алдартанай шажанай дасангууд, байгаалиин үзэсхэлэн һайхан газарнуудшье бии. Зарим газарнууд аяншалагшадай ябахаар зохид, болбосон түхэлтэй болгогдонхой, зарим газарта заһабарилгын ажал үшөөл ябуулхаар. Тиимэһээ Буряад Уласай 100 үзэсхэлэнтэ газар элирүүлхэ талаар мүрысөөн соносхогдоо. Ажаһуугшаднай уласай ямар газарнуудаар аяншалха дуратайб гэжэ ойлгохоёо», - гэжэ «Байкал» гэһэн аяншалгын мэдээсэлэй түбтэ хэлэбэ.
Һанал хуряалгада түрүүлһэн Буряад Уласай үзэсхэлэнтэ 100 газар тухай тодорхой мэдээсэл эндэ харахаар.
Фото: Буряад Уласай аяншалгын яаман
