​Асагадай алтан сэргэдэ Буряадай «Үндэһэн соёлой, болбосоролой эмхинүүдэй эблэлэйхид» бууба

Буряад Уласай Болбосоролой болон эрдэм ухаанай яаманай мэргэжэл­тэдэй дэмжэлгээр «Үндэһэн соёлой, болбосоролой эмхинүүдэй эблэл» 2014 ондо байгуулагдаһан юм. Энэ эблэлэй анхан байгуулагдахадань, аймагуудай 5, хотын 2 һургуулинууд ороһон байна. Мүнөө болоходо, аяар 17 һургуули нэгэдэжэ, үндэһэн хэлэеэ, ёһо заншалаа, соёлоо энэ зандань үлөөхэ, бүри хүгжөөхэ зорилготойгоор ажалланад.

Мүнөө орожо ерэһэн сагаагшан түмэр үхэр жэлээ угтахаяа тус эблэлэй­хид Асагадай дунда һургуулиин алтан сэргэдэ буубад. Хамшагта үбшэнэй дэлгэрһэн үедэ энэ наадан холоһоо боложо үнгэрбэ. Сагаалганайнгаа нааданда хабаадагшад 5 шэглэлдэ хуба­аржа мүрысэбэ.

- Иимэ наада анха удаа холоһоо үнгэргэбэбди! Һайншье, муушье тала­нууд бии байна. Һайн талань гэхэдэ, ха­баадагшад хэдэн модоной зай гаталжа, бэеэ зобооногүй. Тиихэдэ аяар холын Ага, Эрхүү можын һургуулинуудай ша­бинар хабаадалсаа. Тиигэжэ наадам­най можо хоорондын зиндаатай боло­бо. Муу талань гэхэдэ, улаан нюураа­раа уулзажа, гараа дүнгэлсэн золгожо сагаалхагүймнай харамтай, - гээд, энэ эблэлэй түрүүлэгшэ, Үндэһэтэнэй ли­цей-интернадай захирал Булат Шой­жонов хэлэнэ.

Эгээл түрүүн эхилхэдээ, Улаан-Үдэдэ 2000 гаран харагшадтайгаар энэ эблэлэйхид сугларжа сагаалһан юм. Ходол эндэ сугларжа байнгүйгөөр - жэл бүхэндэ бэе бэедээ хүрэжэ, Са­гаалганай найр наадаяа эмхидхэдэг болоё гэһэн шиидхэбэри тиихэдэ абтаһан байгаа. Асагад һайхан нютагта эмхидхэгшэд, эблэлэй зарим гэшүүд үсөөхэнөөршье һаань сугларжа, үрэ дүнгөө гаргабад. «Түрэл нютагаа суурхуулһан абьяас түгэлдэр эрдэм­тэд» гэһэн сэдэбээр энэ уулзалгын үедэ хуралдаан үнгэргэгдэһэн байха юм.

- Түрэл хэлэнэйнгээ хүгжэлтэдэ амаргүй түлхисэ, дэмжэлгэ болохоһоо гадна, нютаг нугын буряадууд танил­сан нүхэсэнэ. Һанал нэгэтэнээрээ уул­зажа, һанаа зобооһон асуудалнуудаа зүбшэн хэлсэхэдээ, ямар бэ даа шиидхэ­бэри абана. Иимэрхүү уулзалгануудые үнгэргэжэ, эрдэм мэдэсээрээ хубаал­дажа байхада, ехэл һайн гээшэ, - гээд, Булат Баирович хэлэнэ.

Хүн зониие хүлгүүлһэн хорото үбшэн номгоржо, ерэхэ жэлдээ бүгэдэ уулзажа сагаалха аргатай болоод бай­ха бэзэбди гэжэ найдая!