Багша, сэрэгшэ – Бадма Шойдоков

Бадма Шойдоков 1921 оной февралиин 24-дэ Захааминай аймагай Далахай нютагта түрэһэн юм. Хяагтын багшанарай училищи дүүргэжэ, удаань Д. Банзаровай нэрэмжэтэ багшанарай дээдэ һургуули эрхимээр дүүргэһэн. Эсэгэ Ороноо хамгаалгын дайнай ветеран. Великие Луки, Новосокольники, Старо-Русь, Невеля хотонуудые,  Пустошко станци хархис дайсадһаа сүлөөлэлсэһэн. Гурба дахин хүндөөр шархатабашье, нютагаа амиды мэндэ бусаха заяатай байһан. Эсэгэ Ороноо хамгаалгын дайнай 1-дэхи шатын болон Алдар Солын III-шатын орденуудаар шагнагдаһан.

Табяад жэлэй туршада Захааминай дунда һургуулинуудта буряад хэлэ литературын багшаар ажаллаһан намтартай. 1950-яад онуудаар ород уран зохёолнуудые буряад хэлэн дээрэ оршуулжа эхилһэн. Удаань, өөрөө зохёолнуудые бэшэжэ эхилээ. Хамтадаа уран һайханай табяад зохёолнуудые бэшэжэ, олон номуудые хэблэжэ гаргаа. Дайнай шэрүүн жэлнүүдтэ, дайнай удаадахи хүндэ жэлнүүдтэ зорюулагдажа бэшэгдэһэн зохёолнуудынь олоной үндэр сэгнэлтэдэ хүртэһэн. Санага нютагай ажалша зондо зорюулһан хөөрөөнүүдэй «Урогуудай һүүлдэ» согсолбори  1956 ондо нара хараһан юм. «Дархан соло» туужаниинь Алдар Солын орденой гүйсэд кавалер Бато Микишкеевич Дамчеевтэ зорюулагдажа бэшэгдэһэн. «Хилын харуулшан» «Шэрнин багша» туужанууд, «Үхэл ба амидарал», «Дайсанай ара талада», «Тоонто нютаг» роман-трилоги, онтохонууд, үльгэрнүүд, шүлэгүүдэй согсолбори саашадаа хэблэлдэ гаргагдаһан байна.

Мүнөөдэр Захааминай аймагай номой сангуудта Бадма Шойдокович Шойдоковой зохёохы намтарта зорюулагдаһан үзэмжэ дэлгээгдэнхэй. Һурагшад тэрэнэй зохёохы намтараар ехэтэ һонирхожо, зохёолнуудыень ходо уншадаг, гэжэ тэмдэглэмээр.