​Буряад Уласта Сагаан һарын үдэрнүүдтэ шэнэ дуунууд мүндэлбэ

Сагаан һарын үдэрнүүдтэ “Амаршалнабди” гэһэн шэнэ дуун “нара хараба”. Буряадай арадай поэт Нина Артугаева бэлигтэй хүгжэмшэн Вера Шобосоева хоёрой энэ бүтээлдэ клип буулгагдажа, олоной дунда тараба.

Бэлдэлгын ажалда үхибүүдшье, түрэлхидшье эдэбхитэйгээр хабаадаа. «Мүнгэн хонхонууд» гэhэн урлалай студиин дуушан, Буряад Уласай Үндэhэтэнэй лицей-интернадай hурагша Хэшэгтэ Балданов, Түнхэнэй Хэрэнэй дунда hургуулиин 5-дахи ангиин шаби Арюуна Зурбаева аба эжыгээ хонгёохон хоолойгоороо хүхюутэй, сортоотойгоор гүйсэдхэн дуулажа амаршалаа. Россиин арадай артист, мэдээжэ зүжэгшэн, үхибүүдэй эгээл дуратай Сагаан Үбгэн Дамба-Дугар Бочиктоев видео-буулгабарида хабаадажа, бүхы багашуулые hонирхуулаа. Үхибүүдээр шагай наадаа. Һайхан үреэлээ дэлгээгээ.

Вера Шобосоевагай тэмдэглэһээр, дууша үхибүүдэй түрэлхидтэ - Сэсэг Балдановнада, Марина Цыденбаловнада халуун баярые хүргэхэ байнабди. Лыксыковтэнэй гэр бүлэдэ баяраа мэдүүлнэбди. Хоёртойхон Занабазар, табатайхан Абида Лыксыковтэн хѳѳрхэн шарайгаараа хүгжэмтэ буулгабарииемнай шэмэглэбэл даа. «Алтан Бүргэд» гэжэ Буряад угсаатанай түбтэ баһал халуун баярые дамжуулнабди.

Сагаалганай баярай найрта элдэб эдеэнэй зүйл табижа, айлшадаа хүндэлхэ гээшэ – буряад арадай урданай заншал. Тиимэhээ халуун эдеэнэй дээжэдэ зорюулһан «Буузын hайндэр» гэжэ үшөө нэгэ шэнэ дуу Нина Артугаева Вера Шобосоева хоёр бэшэжэ, социальна холбоон соогуур тарааба. Арад зон ехэтэ hонирхожо, энэ дуунай хэшэгые тогтоон абаа. Залуу дуушан Дулма зохидхон аянгатай уяхан хоолойгоороо дуулажа, олоной һайшаалда хүртэбэ.

Баяр, жаргал үршѳѳhэн, дурыемнай буляан золгоhон дуунууд утаhан хуурай аялгаар, урамдаhан хүгжэмѳѳр сэдьхэлыемнай дулаасуулаг лэ даа!

АМАРШАЛНАБДИ

Үгэнь: Нина Артугаевагай

Хүгжэмынь: Вера Шобосоевагай

Саhатайхан үбэл ерээ,

Сагаалгамнай айлшалаа.

Хүхюутэйхэн үхибүүднай

Хүлеэгээл даа айлшадаа.

Дабталга:

Хүндэтэй үбгэн аба

Хүгшэн эжы хоёрнай,

Арюун хадагаар золгон,

Амаршалнабди таанадаа.

Сахюусаднай баярланхай,

Сагаан эдеэн билтараа,

Амтатайхан буузын үнэр

Агаарта тунан тараа.

Дабталга:

Үлзытэйхэн үринэрнай

Уян hанаагаа дэлгээн,

Урданай заншалаа hэргээн,

Угтахал даа, Сагаан hараяа!

Дабталга:

БУУЗЫН ҺАЙНДЭР

Үгэнь: Нина Артугаевагай

Хүгжэмынь: Вера Шобосоевагай

Хатан бууза урдамнай,

Хирмасын шүлэн билтараа.

Буурал Буряадай дээжэ -

Буузын hайндэр эхилээ.

Дабталга:

Булган Буряадай шэмэг лэ,

Бууза, бууза, буузамнай!

Байгаа заншалай шэмэг лэ,

Амтатайхан буузамнай!

Хүндэлхэбди буузаараа,

Халуухан лэ сайгаараа

Холын айлшадаа угтан,

Хүхэ хадагаараа золгон.

Дабталга:

Халуун эдеэн бусалаа,

Халирма үрмэн хайнагтаа,

Айлшад үреэлээ тогтоогоо,

Арюун хэшэгээр дээжэлээ.