Буряадта Бута-чан айлшалаа

Япониһоо комикснуудай гол герой Бута-Чан үсэгэлдэр Буряад Улас хүрэжэ ерээ. Владивосток-Москва поездоор аяншалжа ябаһан Бута-Чан Япон гүрэнэйнгөө ажаһуугшадые Ород Уласай түүхэтэй, ёһо заншалтай, эгээл гоё газарнуудтай танилсуулна. Интернет сүлжээнэй аргаар холбоон тогтоогдожо, поездын тогтоһон газарһаа сэхэ дамжуулганууд эмхидхэгдэнэ. Үсэгэлдэр үдэшэндөө холын айлшантай уулзалга Улаан-Үдэ хотын түмэр замай вокзалда боложо, Буряад Уласай аяншалгын яаманай интернет хуудаһанда сэхэ дамжуулга хэгдээ.

Энэ аяншалгын гол үүргэ хадаа, Ород Улас доторхи аяншалгатай Япон гүрэнэй ажаһуугшадые танилсуулга болоно. Тиин поездоор холын аянда ябахада мүн лэ зохид гэжэ харуулагдана.