​Буряад Уласта «Бэе бэеэ гамная» гэһэн дуунда клип буулгагдаа

Зүрхэ сэдьхэл уяруулма «Бэе бэеэ гамная» гэһэн дуу «Байгал» театрай дуушан Гэрэлма Жалсанова хорёод шахуу жэлдэ гүйсэдхэнэ. Дамба Жалсараев Анатолий Андреев хоёрой 1982 ондо бэшэһэн энэ дуу Буряад Уласай хүн бүхэнэ шагнаһан, дуулаһан, мэдэхэ байха.

Буряадуудай олон үхибүүдтэй байхадаа гү, али эртүүр, хадамгүйгөөр басаганайнгаа нарайлхада, үхибүүгүй байһан түрэлэйдөө үргэжэ үгэдэг заншал энэ клиптэ харуулагдаа. Шэнэ клип соо эхэнэрэй залуугаар түрэхэдэ, эжынь тэрэ үхибүүень үргэжэ үгэнэ. Эрид абаритай эжыдээ басаган эсэргүүсэхэеэ айна. Тиигэбэшье нюусаар басагандаа ошодог байна. Эжыньшье алдуугаа ойлгоно. Тиигэжэ залуу эжыхэн басагаяа хулгайгаар гэртээ асархадань, үргэжэ абаһан эжы абань, тэрэ хоёрые хахасуулхаяа зүрхэсэнэгүй.

Буряад драмын театрай зүжэгшэд клиптэ гол рольнуудые гүйсэдхөө: Ородой Холбоото Уласай арадай артистка Марта ЗориктуевА болон Арюна Цыденова.

Клип буулгаха бодолдо Гэрэлма Жалсанова абтажа, сценари найруулаа, режиссёр - «Байгал» театрай сценарист Жаргал Бадмаев, оператор-постановщик, монтажай режиссёр - Гэсэр Раднаев.

«Дуун гомдодог гэжэ байдаг. Энэ дуунда клип буулгаха тухай удаан сагта бодомжолооб. Тиигээд нэгэ доро бүтэшөө. Һанаһанаа бэелүүлхыемни Гэсэр дурадхажа, энэнь намда түлхисэболодо үгөө», - гэжэ Гэрэлма Жалсанова хэлэбэ.