​Будда бурханай түрэһэн үдэр

Зүүн Азиин зарим гүрэнүүдтэ мүнөөдэр, монгол литээр 4 һарын 8-дахи үдэр, үргэнөөр тэмдэглэгдэхэ. Урда Солонгос гүрэндэ энэ үдэр амаралтын гээд, 1975 онһоо хойшо соносхогдоһон юм.

Урда Солонгосой ажаһуугшад Будда бурханай түрэһэн үдэртэ өөрынгөө дасан хиидтэ ошожо, амитан зоной амгалан байдалай түлөө зальбаржа, уншалга хуралнуудта хабаададаг заншалтай. Зарим хотонуудай гудамжануудаар баярай хэмжээ ябуулганууд үнгэргэгдэдэг, улаахан үнгэтэй бадма сэсэгэй дүрсэнүүдые барижа, жагсаал хэдэг юм байна. Мүн тиихэдэ дасан дугануудаа, захадахи талмайнуудые, гудамжануудые иимэ сэсэгүүдэй дүрсөөр гоёодог. Буддын шажанай дасангуудта һайндэрэй ехэ найр үнгэргэжэ, хүн бүхэниие халуун эдеэгээр хүндэлжэ сайлуулдаг байха юм.

Гэхэтэй хамта Макао болон Гонконгдо баһал иимэ һайндэр гүрэнэй хэмжээндэ үнгэргэгдэдэг. Харин наранай мандаха газарта оршоһон Япон гүрэндэ тусхайтаар энэ үдэр тэмдэглэнэгүй. Ушар юуб гэхэдэ, 1873 ондо Япон гүрэн григориан календарь баримталжа, он жэлээ тоолодог болонхой. Тиигэжэ Будда бурханай түрэһэн үдэрынь хабарай дунда һарын 8-да тудана. Энэл үдэр тэндэ сэсэгэй фестиваль болодог юм.