Улаан-Үдэдэ «Алтан гуурһа» абагшад элирээ

Улаан-Үдын 355 жэлэй ойн баярта зорюулжа, “Алтан гуурһан-2021” гэжэ урилдаан эмхидхэгдэһэн байна. Исай Калашниковай нэрэмжэтэ хотын номой санда майн 13-да дүнгүүд согсологдоо. Гансашье Улаан-Үдын бэшэ, мүн Хурамхаанай болон Гусиноозёрскын эдиршүүл “Алтан гуурһа” абаа.

Эдир сэдхүүлшэдэй эблэлые 30-аад жэлдэ хүтэлжэ ябаһан бэрхэ багша Людмила Доржиевагай оролдолгоор энэ хэмжээн үнгэрөө. Олон тоото һургуулинуудтай хүдэлжэ, үхибүүдэй хүдэлмэринүүдые суглуулхаһаа эхилээд, тэдэнииень сэгнэхэ комисси байгуулха гэхэ мэтын эмхидхэлэй талые дууһан даажа абаһан байна. Тиигэжэ һүүлшын хоёр үдэрэй туршада эгээл эрхимүүдыень элирүүлэн, нарин нягтаар хараалжа мэдээбди гээд, Людмила Будожаповна тэмдэглэнэ. Дүршэл ехэтэ сэдхүүлшэ Анатолий Базархандаев “Алтан гуурһа” абагшадай хүдэлмэринүүдтэ өөрынгөө сэгнэлтэ үгөөд, иимэ урилдаан мүнөө сагта угаа хэрэгтэй гэжэ онсолоо.

Эрхимлэһэн эдиршүүл “Полином” дэлгүүрэй сертификадта хүртэхэһөө гадуур шудхамал алтан гуурһануудые абаа. Энэ ехэ бэлэгтэнь урмашаһан Эрдэм ухаанай бага академиин (МАН) дэргэдэ эдир репортёрнуудые бэлдэдэг “Буряад-ФМ” радиогой сэдхүүлшэ Лариса Хабусова ерэхэ жэлдэ бүри олон хүдэлмэринүүдые бэлдээд эльгээхэбди гэжэ найдуулаа. Арина Папина Кирилл Доржиев хоёртой “Сагаалган. Золгохо” гэжэ теле-дамжуулгануудые энэ удаа эльгээһэн байна. Гэбэшье Улаан-Үдын 25-дахи һургуулиин «Крошка. RU» газетын эгээл багахан сэдхүүлшэд олоной нэрьемэ альга ташалганда хүртөө.