838
Эндэ Россиин 75 можо нютагуудһаа 3500 оюутад сугларжа, ехэ һайндэр болоо. Буряад Оронһоо Багшанарай, Соёлой, Телекоммуникациин болон информатикын ехэ һургуулинуудай түлөөлэгшэд ошоһон байна.
Залуушуул фестивалиин зургаан номинацида «Дуу гүйсэдхэлгэ», «Хатар», «Театр», «Хүгжэмэй зэмсэгүүд дээрэ наадалга», «Зохид жанр», «Модо» гэһэн этно-дефиледэ хабаадаа.
Буряадай багшанарай дээдэ һургуулиин оюутад «Байгалай сэсэг» гэһэн хатар дахин бэлдэжэ, фестивалиин жюридэ харуулаа. Жара гаран жэлэй туршада энэ хатарые оюутад гүйсэдхэдэг. Тиимэһээ энэнь аргагүй гоё юм. Жюриин гэшүүд энэшье удаа тэрэ хатарые үндэрөөр сэгнэжэ, арадай хатарай тусхайта шан олгуулаа. Энэл ансамблиин гол хатарша Сарана Дашанимаева «Баяд» хатар гүйсэдхэжэ, түрүү һуури эзэлээ. Зүүн Сибириин соёлой дээдэ һургуулиин «Капуччино» хатарай театр хоёрдохи һуури эзэлээ. Гурбадахи һуурида энэл һуралсалай эмхиин «Шуну» бүлгэм гараа.
Энэ фестивалиин шэлэн абалгын шата онлайн аргаар үнгэрбэшье, эгээл бэрхэ артистнарые жюриин гэшүүд шэлэжэ, түгэсхэлэй шатада уриһан байна. Манай оюутад май һарын амаралтын үдэрнүүдтэ ехэ бэлэдхэл хэжэ, мүнөө иимэ баяртай мэдээсэл манда хүрэбэ», - гээд Буряад Уласай спортын, залуушуулай бодолгын яаманай дэргэдэхи Залуушуулай түбые хүтэлбэрилэгшэ Эржэна Никифорова дуулгана.
