​Буряадай Сэлэнгын аймагта Владимир Поспеловэй үзэсхэлэн нээгдээ

Буряадай габьята уран зураашан Владимир Поспеловэй «Улетели листья» гэһэн үзэсхэлэн Сэлэнгын аймагтай декабристнуудай музейдэ дэлгэгдэбэ. 1996 онһоо 2017 он болотор бүтээгдэһэн 12 зураг олоной һонорто дурадхагданхай.

- Владимир Поспелов (1957-2020 онууд) портрет, пейзаж, натюрморт, сюжетнэ-тематическа зураг гэһэн янза бүриин шэглэлнүүдээр зурадаг байгаа. Түрэл Сэлэнгын аймагтаа уран зураашан аргаггүй дуратай байһан. Энэ дурлалынь зурагууд соонь элеэр харагдана, - гэжэ Буряадай Үндэһэтэнэй музейн мэдээсэлэй албанда хэлэнэ.

Владимир Поспелов зохёохы ажалайнгаа түлөө олон тоото дипломууд болон шагналнуудта хүртэнхэй. Тодорхойлбол, Ородой Холбоото Уласай уран зураашадай зохёохы зүблэлэй алтан медаль, уран һайханай Ородой академиин диплом, «Сибирь-Х» гэһэн уран һайханай можо нютагай үзэсхэлэнэй диплом, «Китай, Монголия, Бурятия» гэһэн уласхоорондын салоной мүнгэн медаль болон бусад.

Владимир Поспеловэй бүтээлнүүд Буряадай Үндэһэтэнэй музейдэ, Улаан-Үдын түүхын музейдэ, Владивосток хотодо А.А. Арсеньевэй нэрэмжэтэ Примориин хизаарай уран һайханай-хизаар ороноо шэнжэлэлгын музейдэ, Москва хотын «Русская галерея – XXI век» сэдхүүлэй хэблэлэй байшанда, Ород гүрэндэ болон Япони, Солонгос, Хитад, Франци, США-да хубиин суглуулбаринуудта хадагалагданхай.