470
«Новая Звезда» гэһэн теле-мүрысөөнэй (16+) түгэсхэлэй шатада Бадма-Ханда Аюшеева хоёр дахин тайзан дээрэ гараа. Түрүүн тэрэ Зара дуушантай сербскэ хэлэн дээрэ «Эдерлэзи» гэһэн дуу гүйсэдхөө. Харагшадай һанал хуряалгын дүнгүүдээр илагшад, мүрысөөнһөө гадуур Ородой "ододтой" дуулаа.
Хоёрдохиёо тайзан дээрэ Бадма-Ханда Баттувшин Балданцэрэнтэй гаража, «Амар мэндэ» гэһэн арадай дуу хангюурдаа. Энэ номер жюриин гэшүүд 100 баллаар сэгнээ.
- Намда хадаа Бадма-Ханда мүрысөөнһөө гадуур хабаадаха артитст болоно. Би тэрэнэй хүн шанарынь, мэргэжэнги шанарынь ехэтэ сэгнэжэ бахархааб, тэрэ онсо һайхан хоолойтой. Би таниие шагнаха дуратай хүнүүдэй нэгэн болоноб, һайн даа, - гэжэ Зара баяр хүргэбэ.
Ородой Холбоото Уласай артист Юрий Николаев Буряадай түлөөлэгшэдэй номер сэгнээ.
- Эхинһээнь эсээ хүрэтэрнь шагнааб, арадай дуунуудта намай ямар хандасатайб гэжэ мэдэнэт. Хөөмэйн дуун намда ехэтэ һайшаагдаа – эдэ бүгэдэ нэгэ дуун соо зэдэлхэдээ, аргагүй гоёор тааража, зорюута хэгдэһэн гэжэ намда һанагдаагүй. Эндэ хэжэ байһан ажалдаа танай үнэн сэхэ хандаса харагдана. Асари ехэ баяр хүргэжэ, амжалта хүсэнэб, - гэжэ мэдээжэ хүтэлэгшэ хэлэбэ.
«Новая звезда» мүрысөөнэй дүнгүүдээр, Курска можын 23-тай Василина Иванова түрүүлээ.
Буряадай дуушан Бадма-Ханда Аюшеева харагшадай һанал хуряалгын дүнгүүдээр, тусхай мүнгэн шанда хүртөө. Программын түрүүшын тоглолтын дүнгүүдээр, тэрэнэй түлөө 73,8% харагшад дуугаа үгэһэн байна.
Фото: скриншот
