​Москвагай зүжэгшэд - Улаан-Үдэдэ

Чеховэй нэрэмжэтэ Москвагай уран һайханай театр энэ намартаа Улаан-Үдэ хотодомнай гастрольдо ерэхэ гэжэ мэдээжэ болобо.

Энэ түүхэтэ үйлэ хэрэг «Ехэ гастрольнууд» гэһэн бүхэроссиин түсэлэй аргаар бүтэхэ болобо. Суута театрай уран бүтээлнүүдые гэртэһээ холо ошонгүй хараха аргатай болоһон манай нютагаархид ехэл баяртайнууд ёһотой. Тэдэнэр августын 28-һаа сентябриин 2 болотор зүжэгүүдээ харуулха юм. Халдабарита үбшэнэй номгороо хадань бидэнэр суута театрай аяар 3 зүжэг хараха аргатайбди. «Серёжа» (16+), «Телефон доверия» (16+) и «Пролётный гусь» (16+) гэһэн зүжэгүүд дуратайшуулай үзэмжэдэ табигдаха.

Ниислэл хотын театрнууд манайда түрүүшынхиеэ ерэнэ бэшэ. 2014 онһоо хойшо Вахтанговай нэрэмжэтэ театр, “Et Cetera» гэһэн Москвагай театр, Гүрэнэй академическэ Бага театр, Маяковскиин, Санкт-Петербургын «Мастерская» гэһэн суута театральна бүлгэмүүдэй талаан бэлигтэй зүжэгшэдэй наада анхарха аза талаантай байгаабди. Алдарта театрай зүжэгшэдэй наада заатагүй харахабди гэжэ найдая, - гээд, соёлой сайд Соёлма Дагаева мэдүүлнэ. Тус театрай зүжэгүүдтэ биледүүд июлиин 20-һоо эхилжэ, Бестужевай нэрэмжэтэ Ород драмын театрай сайт дээрэ худалдагдажа эхилхэ.