512
Буряадай гүрэнэй филармони ээлжээтэ түсэл бэелүүлхэ тухайгаа олоной һонорто дурадхаба. Тэрэ түсэлэй ёһоор, аялга дуунда дуратайшуул ямар бэ даа хүгжэмтэ хэрэгсэл дээрэ һайхан дуунуудые үзэсхэлэнтэ байгаалиин нюрууда зэдэлүүлжэ байһанаа, видео дээрэ буулгаха болоно.
- Буулгагдаһан зураглалтнай һайн шанартай, сэбэр абяатай байха ёһотой. Тэрэнээ уһа голой эрьедэ, түүдэгхэнэй дэргэдэ, үгы гэбэл, зуһаланайнгаа хорёо соо буулгаха хэрэгтэй. Ондоо тээ урид хэблэгдээгүй байха ёһотой гэһэн гол эрилтэтэй болоно, -гэжэ эмхидхэн байгуулагшад дуулгана.
Буулгагдаһан эдэ бүтээлнүүдынь «Нүүдэлшэдэй ая дуун» гэһэн фестиваль болон гүрэнэй филармониин сайт дээрэ болон социальна холбоонуудта толилогдожо, харагшадта дурадхагдаха юм. Эгээл эрхим гэжэ тоологдоһон дуушан ерэхэ 2022 ондо үнгэргэгдэхэ «Нүүдэлшэдэй ая дуун» гэһэн түсэлдэ оролсохо аргада хүртэхэ. Үшөө тиихэдэ харагшадта эгээл һайшаагдаһан дуушан тусхай бэлэгээр урмашуулагдаха. Арад зоной бүтээһэн ажалнуудые зунай һүүлшын һарын һүүлшын үдэр болотор эмхидхэгшэд хүлеэн абаха.
Хүн зоной улаахан зүрхэ шэмшэрүүлхэ аргатай аялга ниилүүлэн дуулаха аргатай һайхан хоолойтой хүбүүд, басагад манай Буряадта олон даа. Тиихэдэ үзэсхэлэн һайхан байгаалиин газарнууд мүн лэ үсөөн бэшэ. Уянгата хүгжэм гээшэ ямарханшье хүнэй зүрхэ сэдьхэлдэ сэсэг таридаг аргатай ха юм даа. Тиимэһээ энэ түсэлэй аргаар Буряадаймнай хүгжэмэй огторгойдо үшөө олон шэнэ одод яларха аргатай бшуу.
Фото: Буряад Уласай соёлой яаман
