​Соёл урлалда дүтэлүүлхэ

Буряадай оюутад болон ахамад классай һурагшадта тусхай “Пушкинская карта” һуралсалай шэнэ жэлһээ барюулагдажа эхилхэнь. Тэндэнь гурба-гурба мянган түхэриг оруулагдаха

Ородой Юрэнхылэгшэ Владимир Путинтай һая эмхидхэгдэһэн сэхэ утаһанда “Пушкинская карта” байгуулха тухай хөөрэлдөөн болоһон байна. Энэ картатай залуу һүрэг музей, театрнуудаар ябаха аргатай болохо юм.

Буряад Уласай соёлой сайд Соёлма Дагаевагай хэлэһээр, 18 наһа хүрөөдүй үхибүүдтэ соёлой һалбарида үнинэй хүнгэлэлтэнүүд үзүүлэгдэнэ. Һарын нэгэ үдэр тэдэ миинтээр музей орохо аргатай. Жэшээлбэл, Буряадай Үндэһэтэнэй музейдэ үхибүүдэй үдэр һара бүхэнэй түрүүшын вторник гээд тоологдоно. Забайкалиин арадуудай этнографиин музейдэ үхибүүд һара бүхэнэй һүүлшын амаралтада миинтээр ороно.

2021 оной түрүүшын 6 һарын дүнгөөр музейдэ 23 мянган 336 һурагша болон 4 мянган 99 оюутан ороо гээд тоо баримта харуулна.

Соёлма Дагаевагай тэмдэглэһээр, “Пушкинская карта” соёл урлалай һургуулинуудай, мэргэжэлтэ дунда болон дээдэ һуралсалай гуламтануудай шабинарта тон туһатай зүйл боложо үгэхэ. Тэдэ дуратай үзэсхэлэндэ, концерттоглолтонуудта ошожо, бэлиг шадабарияа, дүй дүршэлөө мүлихэ аргатай болохо гээд һанагдана. Мүн юрын һуралсалай гуламтануудай үхибүүд соёлой, түүхын, урлалай талаар эрдэм мэдэсэеэ дээшэлүүлхэ.

14-22 наһатайшуул “Госуслуги” порталай өөрын хуудаһанда мэдүүлгэ оруулжа, “Пушкинская карта” абаха аргатай.