Нютагтаа хүршэ хүбөө ажаһуудаг Буда Шултумович Шагдуржаповай, Мария Дугаровна Цыденовагай үхибүүд зохёохы һэдэбтэй зон болон үндыгөө юм. Гомбо хүбүүниинь барилдаагаар спортын мастер, Буряад Республикын габьяата тренер, Дарима басаганиинь БГУ-гай гүрэнэй университедэй багша, педагогикын эрдэмэй кандидат, доцент мүн. Харин Цырена басаганиинь нёдондо жэлһээ Хонгор уулада амарһан тухайгаа тэмдэглэлнүүдэй дэбтэр (дневник) редакцида асаржа харуулаа бэлэй.
Нютагай түбһөө гол өөдөө гушаад модоной зайда оршодог Хонгор уулын хоморой үзэгдэлнүүд, байгаалиин шэнжэнүүд, үдэр бүриин амаралтын ямараар үнгэрһэн тухайнь алдангүй бэшэжэ абаһанаа ниитэ зондоо дурадхаха гэжэ шиидэбэ ха юм.
Үнэндөө нютагай аршаануудай аша туһа тухай хөөрэлдөөн олондо мэдээсэл дамжуулдаг хэрэгсэлнүүдэй хуудаһануудта, радио, телевиденеэр боложол байдаг гээшэ. Экологическа энэ темэдэ өөрын дуһал-хубита оруулха гэһэн нигүүлэсхы хүсэл Цырена Будаевнае хүтэлөө ёһотой. Теэдшье түрэл тоонтодоо амин шухала мэдэрэлээ зорюулхадаа, үнэхөөр һүзэглэн һүгэдэһэнтэй, шүтэн зальбарһантай адли бэшэ гү?
Дэлхэй дууладаг, дэлхэй соносодог, өөрын амитай, шэхэтэй гэжэ гэлсэдэгбди. Тэрээн мэтээр жэл бүри зунай дунда һарын 13-да тахигдадаг 13 обоотой Хонгор уулада хонхын абяанай жэнгирхэдэ, хаана холо Уляатайда байһан Муханаагай төөбии дуулажархидаг байгаа гэжэ «Аршаантан» номой автор Цыден-Еши Ринчинова бэшээ бэлэй.
Иимэ һайхан домогой мүнөө хүрэтэрөө дамжан ерэһэниинь һайшаалтай.
Хонгор уулын хонхо тиимэл шэдитэ шэнжэтэй байгаа гү? Дуулдаха гэһэн хүндөө дуулдаад орхидог...
Энэ удхадань Цырена Намсараева-Шагдуржапова өөрын нэмэри оруулба ха. Үлэгшэн нютагтамнай үшөө нэгэ хизаар ороноо шэнжэлэгшэ мүндэлбэ гэжэ тоолоё. Иимэ зураглалбэшэлгэнүүдээр нютагаа шэмэглэн ябыш гэжэ түрүүшынгээ «Хонгор уулын сэсэгүүд» гэһэн ном һая хэблүүлэн гаргуулһан Цыренэдэ хүсэел даа.
Галина БАЗАРЖАПОВА-ДАШЕЕВА, Буряадай арадай уран зохёолшо