Ээлжээтэ «Эдир Будамшуу» Буряадта үнгэргэгдэхэнь

Байгша оной октябриин 7-до “Эдир Будамшуу” айлшадаа суглуулхань. Халдабарита үбшэнһөө боложо, хоёрдохи жэлээ тус конкурс онлайн аргаар үнгэрхэ.

Аяар 2006 ондо Россиин арадай артист Михаил Елбонов нютагтаа “Эдир Будамшуу” гэжэ нэрэтэй түрүүшын конкурс зарлаа бэлэй. Тэрэнь мүнөө арбан долоодохиёо болохонь. Энэ сагай хугасаа соо хэды олон эдир бэлигтэйшүүл Будамшуунууд болохо хүсэлөө мэдүүлээ гээшэб! Хабаадаха зон олон байжа, хоёрдохи конкурс уласхоорондын зиндаатай болоһон байха. Монголһоо, Хитадай Үбэр Монголһоо, мүн тиихэдэ Буряадай, Эрхүүгэй, Үбэр Байгалай хизаарай, Хальмагай эдир Будамшуунууд хабаадахаяа ерэгшэ бэлэй.

- Манай Буряадтамнай, хүршэ Агын болон Усть-Ордын тойрогуудта ямар бэрхэ бэлигтэй залуу халаан ургажа байнаб даа. Тайзан дээрэ наадаха зүжэгшэд урган гараһай гэжэ һанаад, багаһаань тэдэнэй бэлигыень элирүүлжэ, олоной оройдо одон мэтэ болохынь түлөө энэ урилдаа эмхидхээб. Эгээн түрүүн түрэл һайхан тоонто Гаарга нютагтаа эхилээбди. Мүнөө 17-дохиёо үнгэрхэнь. Саг гээшэмнай хатуу, шэрүүн, тиигээшье һаань, арга мүрыень оложо, Соёлой, Һуралсалай яамануудай, мүн түрэл Буряад театрайнгаа дэмжэлгээр эдир Будамшуунууд элиржэл байна. Урилдаанда оролсожо шалгарһан хүбүүдэй дундаһаа соёлой һалбарида, мүн артистнууд болоһон зон үсөөн бэшэ. Намаяа багшамни гэжэ нэрлэдэг байһандань баярлажа, бахархажа ябадагби, - гэжэ Михаил Елбонов тэмдэглэнэ.

Үнэхөөрөөшье, эдир наһандаа эдир Будамшууда хабаадаһан, мүнөө сагта хүн зондоо хүндэтэй, зариманиинь артистын харгы шэлэһэн зоншье байха. Бултыень нэрлэхын аргагүй.

Россиин арадай артист Михаил Елбонов Будамшуугай дүрэ ялас гэмээр гүйсэдхэжэ, арадайнгаа сэдьхэлдэ бата бэхеэр хадуугдаа. “Эдир Будамшуу” гэһэн конкурс эмхидхэхэ бодолдо тэрэ нэгэтэ абтажа, һанаһанаа бэелүүлжэ шадаа.

Булад Самбилов түрүүшын конкурсдо хабаадаһан юм. Һанамжаараа иигэжэ хубаалдаба:

- 2006 ондо 10-дахи ангида һуража байгааб. Тиихэдэ түрүүшынхиеэ Буряад театрай тайзан дээрэ гаража туршааб. Тэндэһээл тайзанда дурлаад, артистын харгы шэлэжэ абааб. Михаил Елбонов - нютагаймнай бэлигтэй хүн, үхибүүдтэ угаа хэрэгтэй конкурс эмхидхээ. Жэл бүри Буряадай бүхы аймагуудһаа бэлигтэй хүбүүд ерэдэг. Буряад хэлэеэ дэмжэхэ, хүгжөөхэ хэрэгтэ Михаил Гомбоевич ехэхэн нэмэри оруулдаг. Минии хуби заяанда “Эдир Будамшуу” ехэ нүлөөлөө. Тиихэдэ хабаадаагүй һаа, зүжэгшэнэй харгы шэлэхэ байгаа гүб? Хэлэхын аргагүй. Санкт-Петербургын Гүрэнэй зүжэгэй институдта 4-дэхи студида орохо хэрэгтэм баһал туһа боложо үгөө. Тэрэнээ 2011 ондо түгэсхэжэ, Хоца Намсараевай нэрэмжэтэ Буряад театрта алба хэжэ байнаб.

Мүнөө жэлэй “Эдир Будамшуу” конкурсдо жюриин гэшүүдээр мэдээжэ арадай артистнууд, ниитын ажал ябуулагшад, дээдэ һургуулиин багшанар, олондо мэдээсэл тараадаг эмхинүүдэй түлөөлэгшэд оролсохо. 20 гаран эдиршүүл хабаадаха байһанаа мэдүүлээ. Тиин нэгэ үдэрэй туршада илагшад элирүүлэгдэхэ ёһотой. Эдир Будамшуунуудта амжалта хүсэнэбди.