​«Буряадай үхибүүд» гэжэ фильм эрхим баримтата найруулга гэжэ Москвада түрүүлээ

Москвада үнгэрһэн «Эхэ оромни – эльгэ зүрхэн соомни» гэһэн медиафестивальда «Буряадай үхибүүд» гэжэ фильм эрхим баримтата найруулга гэжэ шалгарба. Россиин можо нютагуудһаа эльгээгдэһэн аяар 172 хүдэлмэриһөө 31-иинь түгэсхэлэй шатада гараһан байгаа. Тэдээн сооһоо түрүүлхэ гээшэ ехэ гэгшын амжалта болоно гээд, тус фильм буулгуулһан Эдир сэдхүүлшэдэй эблэлэй түрүүлэгшэ Людмила Доржиева онсолон тэмдэглэбэ.

«География детства» гэжэ баримтата фильмүүдэй цикл Татьяна Мирошник найруулан буулгаа. Тэрэ циклэй бүридэлдэ Адыгейн, Крымэй болон Буряадай үхибүүд тухай баримтата фильмүүд ороно. 2020 ондо энэ түсэл бэелүүлэгдэһэн. Тиихэдээ эгээл түрүүн Буряадай үхибүүд тухай фильм буулгагдаһан юм. “Бага нютаг һууринуудай үхибүүдые буулгуулхаяа оролдообди. Тэдэнэй үбгэ эсэгэнэрэйнгээ үндэһэн ажал хэжэ байхыень энэ фильм дотор харуулаабди. Айраг бүлэхэ, арһа элдэхэ гэхэ мэтын ажал тэдэ хэнэ. 15 минутын туршада Буряадай бүхы үзэсхэлэнтэ газарнуудшье ороо”, - гэжэ Людмила Доржиевна онсолно. Россиин кино найруулагшадай гильдиин түрүүлэгшэ Игорь Степанов Людмила Будажаповнада Баярай бэшэг дамжуулаа. Тэрээн соонь иигэжэ бэшээтэй: “Буряадай үхибүүд” гэжэ баримтата фильм буулгуулгада эдэбхитэйгээр оролсоһонойтнай түлөө баяр талархалаа мэдүүлнэбди. Буряадай үхибүүдэй гайхамшагта юртэмсэ бодотоор харанабди. Тэдэн Байгал далайтаяа танилсуулна, буряад арадай ёһо заншал – тэрэ тоодо заншалта эдеэн, мори урилдаан гэхэ мэтэ тухайшье хөөрэнэ...”