​Ээлжээтэ үндэр амжалта

Лудуб Очиров  «Джаз на Байкале» фестивалиин «Открытия года» гэһэн үндэр шанда хүртэбэ. Мүнөөдэр тэрэ һайндэртэ хабаадагшадые шагналгын баяр ёһолол үнгэрһэн байна. Лудуб Очировта шагналыень Орос Уласай арадай зүжэгшэн Игорь Бутман барюулаа.

- «Джаз на Байкале» гэһэн фестиваль Эрхүү можодо аяар 15-дахияа үнгэргэгдэбэ. Байгша ондо эдир хүгжэмшэдтэй хамта дүршэл ехэтэй мэргэжэлтэд хабаадаха эрхэдэ хүртэһэн юм. Эгээл иимэ харилсаанай ашаар хүгжэмшэдэй бэеэ бэетэеэ дүршэлөө хубаалдахадань бэлэн бшуу, - гэжэ тус фестивалиин уран һайханай талаар хүтэлбэрилэгшэ, продюссер Александр Филиппов дуулгана.

Лудуб буряадтаа үнинэй мэдээжэ, мүн гадууршье олон урилдаануудта хабаадажа түрүү һуури эзэлдэг болонхой.

-Үндэр ехэ амжалтада хүртэһэндөө багша Ирина Ершовада ехэ баяр хүргэнэб, - гэжэ Лудуб өөрынгөө хуудаһанда бэшэнэ.