​Бэлигтэйшүүлэй "үлгы" лэ

«Раздолье» ансамблиин дангина

Ерээдүйн малай эмшэн Ульяна Авдеева түрэл Татауровынгаа гимназида һуража байхадаа, хасагуудай арадай дуунуудые гүйсэдхэжэ, суутай болоһон юм. Бэлигтэй басагые академиин “Раздолье” ансамбльда ябадаг ахамад курсын оюутад абаһаар лэ обёороо, дуулахыень уряа. - 2020 оной ноябрь һарада Буряад Уласай Толгойлогшо Алексей Самбуевич Цыденов манай тоглолто харахаяа ерээ һэн. Һургуулидаа хэды тайзан дээрэ гарабашье, түрүүшынгээ тоглолтын үедэ тон ехээр һанаагаа зобооб, үгэнүүдээшье мартахаяа һанааб. Эдэ бүгэдые хараһан дуунай багша Татьяна Алексеевна удаань хүн бүхэнтэймнай хүдэлжэ, тайзан дээрэ зүбөөр бэеэ барихыемнай һургаа. Мүн дуунуудай үгэнүүдтэ анхаралаа ходо хандуулжа байдаг, буруу хэлэбэлнай, заһадаг. Хоорто 15 хүн хабааданабди. Хасагуудай, шэмээшэгүүдэй болон ород арадай дуунуудые гүйсэдхэнэбди. 2021 ондо хасагуудай хуралдаанда онлайн аргаар хабаадажа, түрүүлжэ шадаабди. Теэд ансамбльда ерэһэн 1-дэхи, 2-дохи курсын оюутад нэгэ бага аза үгы гү даа? Юуб гэхэдэ, пандемиин һүжэрхэдэ, холо ойгуур гастролёор ябанагүйбди, - гэжэ Ульяна Авдеева һонирхолтойгоор хөөрэнэ.

Нюргаа барижа һураад лэ...

Газар хэмжэлгын, кадастрын болон мелиорациин институдай 4-дэхи курсын оюутан Мунко Майоров “Алтан булаг” ансамблиин бүридэлдэ Европын гүрэнүүдээр, Ородойнгоо хотонуудаар ковид үбшэнэй һүжэрөөгүй байхада, яһала ябажа үрдеэ. Испани, Португали, Хитад гэхэ мэтэ хари гүрэнүүдэй тайзан дээрэһээ талаан бэлигээ харуулһан байна. Мунко 1-дэхи курсын байгаад, “Алтан булагай” хатарай гол бүлэгтэ орожо шадаа бэлэй.

- Түрэл Усть-Ордын тойрогто һургуулиин ябахадаа дууладаг, хатардаг һэм. Хэды тиигэбэшье түрүүшын репетицинүүдтэ яһала хүлһөө адхааб. Хатар яагаад гүйсэдхэгдэдэг бэ гэжэ ойлгохогүй, тайзан дээрэ нюргаашье барижа шадахагүй намайе гол бүлэгтэ юундэ абажархёо һэм тиихэдэ гэжэ мүнөөшье ойлгодоггүйб. Бэлигтэй багша Людмила Лудуповна Овчинниковагай хүтэлбэри доро һураад, мүнөө яһала һайн хатаршан болоод ябанаб, - гэжэ Мунко Майоров түрүүшынгээ алхамуудые һанан хөөрэбэ. Мунко Майоров мүнөө 10 гаран хатарта хабаадалсана.

Шадамар дуушан.

2011 ондо академиин дэргэдэ тува угсаатанай дуунай “Салгал” ансамбль байгуулагдаһан юм. 10 жэлэй хугасаада олоной дунда мэдээжэ болонхой. Эндэ ганса эрэшүүл ябадаг байһан һаа, һүүлэй сагта басагадшье оролсодог болонхой. Алдар Дамыран ансамблиин мүнөө үеын одон гээд тоологдоно. Тэрэ түрэл нютагтаа дунда һургуули дүүргээд, Улаан-Үдэ ерэһэн юм.

- Гэртэхимни ходо дуулалдажа байдаг, абамни арадай хүгжэмэй хэдэн зэмсэгүүд дээрэ наадажа шададаг. Би багаһаа хойшо хоолойгоо хашан дуулаха дуратайб. Мүн арадай дуунуудые гүйсэдхэдэг һэм. Минии дуунай багша, эндэ һураһан ахамни Буряадтал һурахаяа ошо гэжэ намайе эльгээгээ. Нэгэ һуралсалай гуламтын дэргэдэ аяар дүрбэн томо ансамбль хүдэлжэ байдаг юм гэжэ абаһаар лэ һонирхооб. Буряад угтай Баир Чимитдоржиевич багша тува дуунуудта һургажа байхадань, бүри ехээр гайхаа һэм, - гэжэ технологическа факультедэй 2-дохи курсын оюутан Алдар Дамыран хөөрэнэ.

2021 оной май һарада Казань хотодо хүдөө ажахын дээдэ һургуулинуудай хоорондо үнгэргэгдэһэн фестивальда Алдар Дамыран 1-дэхи болон 2-дохи шатын дипломуудта хүртөө. Арадай дуунай урилдаанда түрүүлээ ааб даа. Алдарай эстрадна дуу хангюурдахадань, жюриин гэшүүд бүри ехээр һонирхожо, 2-дохи шатын дипломоор урмашуулаа.

- Эстрадна дуунай урилдаанда хабаадагшад гунигай дуунуудые олоор гүйсэдхэжэ, дурыемни гутаагаа. Мүн оперноор дуулахашье хүнүүд ушараа. Тиихэдэнь гаража ерээд лэ, баяртай, хүхюутэй бүтээл дуулажархёоб даа. Зал соо уруу дуруу болошоод һууһан харагшадые хүл дээрэнь бодхоожо шадааб, - гэжэ Алдар Дамыран мэдүүлнэ.

Мүнөө үеын хатарнуудта дуратай

“Амвитэй” ансамблиин аха захатанай тоодо ородогби”, - гээд, ветеринарна эмнэлгын 2-дохи курсын оюутан Саяна Очирова намайе гайхуулаа. Ушар гэхэдэ, Саяна академиин дэргэдэхи агротехническэ колледждо һураха үедөө “Амвитэй” ерэһэн байшоо. - Загарайн аймагай Эрхиригэй дунда һургуулиин шаби ябаад, мүнөө үеын эстрадна хатарнуудые гүйсэдхэжэ һурааб. Улаан-Үдэдэ һуралсалаа үргэлжэлүүлхэдэмни, оюутан болоһон ушараар эмхидхэгдэһэн хэмжээ ябуулгада БГСХА-гай бүхы ансамбльнууд хабаадалсаа. Тэндэл “Амвитэй” намда һайшаагдаа бэлэй. Мүнөө үедэ бүхы хатарнуудта хабаадалсанаб гэхэдэ, алдуу болохогүй. Эдэмнай тоолошогүй олон. 2004 онһоо хойшо табигдаһан хатарнуудые гүйсэдхэнэгүйбди, тэдэмнай хуушараа, - гэжэ Саяна Очирова мэдүүлнэ. Саяна Очирова түрэл академиингээ баяр ёһололдо нүхэдөөрөө шэнэ наада табихаяа бэлдэжэ байнхай