​Дэлхэйн үйлэдбэриин түүхэдэ шэнэ хуудаhан нээгдээ

Буряад Уласта «Озёрный» гэһэн уулата уурхайн-шанаржуулгын комбинадай ажал ябуулгын эхи мэдүүлһэн хэмжээ ябуулга болоо.

Тэрээндэ Оросой Холбоото Уласай Юрэнхылэгшэ Владимир Путин, Оросой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Оросой Юрэнхылэгшын бүрин этигэмжэтэ түлөөлэгшэ Юрий Трутнев, Алас Дурнын ба Арктикын хүгжэлтын талаар яаманай толгойлогшо Алексей Чекунков болон үйлэдбэриин эмхиин түлөөлэгшэд хабаадаа. 

 «Озёрный» ГОК 2025 ондо дүүрэн хүсэндөө орохоор түсэблэгдэнэ. Тиихэдээ жэл бүри 6 сая тонно хүрэтэр руда болбосоруулжа, цинкээр бүтээгдэһэн 600 мянган тонно эд бараа ба 82 мянган тонно туулган концентрат үйлэдбэрилжэ байха юм ха.

Иимэ үргэн дэлисэтэй түсэлэй богонихон болзор соо бэелүүлэгдэһые тайлбарилха гэбэл, түсэлнүүдые мүнгөөр хангадаг институдууд хабаадуулагдаа, мүн гүрэнһөө туйлай ехэ дэмжэлгэ үзүүлэгдээ гэжэ хэлэхэ хэрэгтэй. 

- Гүрэнэй, мүн Буряад Уласай оруулһан хубита тон ехэ юм. Мүн түсэлшье өөрөө нилээд томо. Энэ хэбтэшэ 1961 ондо нээгдэһэн байна. Тэрэ хадаа дэлхэй дээрэ эгээ томо цинкын уурхайнуудай арбанай тоодо ородог юм. Теэд тэрэниие олзоборилхо арга үгы байгаа. Энэ түсэлшье мүн бэлээр бэелүүлэгдээгүй. Хоёр дахин эхилэгдэһэн аад, хүсэндөө хүргэгдэнгүй дүүргэгдэхэ баатай болоо һэн. Мүнөө эндэ ажаллажа байһан хамжаан эдэй засагай талаһаа ашаг үрэтэйгөөр ажал ябуулхын аргагүй ехэ ажал хээ, таарамжатай технологинуудые олоо. «Озёрный» ГОК-ой ашаглалгада тушаагдаһан ушар гүрэнэймнай эдэй засагай бэеэ дааһан байдал хангаха хэрэгтэ хубита оруулхаһаа гадна, гансашье манай гүрэнэй бэшэ, бүхы дэлхэйн үйлэдбэриин түүхэдэ шэб шэнэ хуудаһа нээбэ гээшэ. Дүүрэн хүсэндөө хүдэлжэ эхилхэдэнь, 1200 гаран хүн ажалтай болохо. Бюджедэй туһаламжаар, Засагай газарай туһаламжаар Алас Дурнын тойрогто ба бүхыдөө Орос гүрэндэ шухала удха шанартай түсэлэй бэелүүлэгдэжэ байһаниинь һайшаалтай, - гэжэ Алас Дурнын федеральна тойрогто Оросой Юрэнхылэгшын бүрин этигэмжэтэ түлөөлэгшэ Юрий Трутнев хэлээ.    

Алас Дурнын ба Арктикын хүгжэлтын талаар яаманай толгойлогшо Алексей Чекунковой хэлэһээр, «Озёрный» ГОК барилгада 100 миллиард түхэриг гаргашалагдажа, Буряад Уласай эгээ томо инвестиционно түсэлнүүдэй нэгэн болоо.

- Тус үйлэдбэри түсэблэгдэһэн хүсэндөө хүдэлжэ эхилхэдээ, Орос гүрэн дотор цинкын концентрат гаргадаг эгээ томо, мүн дэлхэй дээрэ табадахи үйлэдбэри болохо. Алас Дурнын тойрогой ниигэмэй ба эдэй засагай хүгжэлтые удаан саг соо хангажа байха үшөө нэгэ флагман бии болобо, - гэжэ Алексей Чекунков тэмдэглээ. 

«Озёрный» гэһэн уулата уурхайн-шанаржуулгын комбинат нээлгын баяр ёһололой үедэ

Буряад Уласай Толгойлогшо Алексей Цыденовэй онсолон тэмдэглэһээр, Яруунын аймагта «Озёрный» ГОК-ой баригдаһан ушар уласай ажаһуугшадай үнинэй хүлеэһэн шухала удха шанартай түсэл юм.

- «Озёрный» ГОК гээшэ шэнэ үйлэдбэриин эмхи, шэнэ бүхэли бүтэн һалбари, ажалай шэнэ һууринууд, Яруунын аймагай шэнэ амидарал мүн. Бүхыдөө уласнайшье энэ түсэлэй туһа нүлөө өөр дээрээ мэдэрхэ, - гэжэ Алексей  Цыденов хэлэбэ.

 

Дүүрэн хэмжээндээ хүдэлжэ эхилхэдэнь, 1200 гаран хүн ажаллаха аргатай болохо.

«Озёрное» гэһэн хизаарлагдамал харюусалгатай эмхиин юрэнхы захирал Владислав Свиблов ГОК-ой барилга 2019 ондо эхилээ һэн гэжэ һануулаа.

- Бидэ тон ехэ ажал хээбди: үргэн дэлисэтэй технологическа шэнжэлгэнүүдые ябуулаабди, шанаржуулгын онол аргануудые элирүүлээбди, хэлсээнүүдые баталжа, хэрэгтэй оньһон түхеэрэлгэнүүдые бүтээгээбди. Мүнөө дээрээ «Озёрнын» технологическа хангалга, тэрэ тоодо Орос гүрэндэ зохёогдоһон үйлэдбэриин  үндэр шанартай флотомашинанууд, онсо шухаг гэжэ тэмдэглэхэ хэрэгтэй. Тэрэнэй һайгаар уурхайда олзоборилогдоһон рудаһаа тон шанартай концентрадууд гаргагдана, - гэжэ Вячеслав Свиблов тэмдэглэнэ.  

 «Озёрный» ГОК-то үйлэдбэриин, унаа тээбэриин, элшэ хүсэнэй, ниигэмэй удхатай инфраструктурын гол объектнүүд ашаглалгада тушаагданхай. Тус үйлэдбэри улас дотор эгээ түрүүлэн оршон тойронхи байгаали хамгаалгын талаар үндэр эрилтэнүүдтэ таарама байжа, зүбшөөл абаа гэжэ тэмдэглэлтэй.