Буряад-монгол зурхай июлиин 23-һаа 27 болотор

Июлиин 23, гарагай 4, буряад-монгол литээр 29 (28 таһарба).

Нирманарати замбиһаа бурхад буужа, хүн зоной үйлэ хэрэгүүдые сэгнэдэг.

29-дэ дайсаниие номгодхохо, ада шүдхэр дараха, гүү бариха, мал гаргаха, агнаха хэрэгүүдтэ һайн. Бэриин, наһа барагшын хэрэгүүдые бүтээхэдэ, дэгэл хубсаһа эсхэхэдэ, адуу малай үһэ нооһо хайшалхада, эд бараа, адуу мал худалдахада, аралжаа наймаа ябуулхада муу.

Амгалан тайбанай, мориной хэшэг даллага абахада; бар, морин, нохой жэлтэй хүнүүдтэ хии мориёо хиидхэхэдэ һайн.

«Үхэлэй» үүдэн нээгдэнэ: наһа барагшын хэрэ гүүдые үйлэдэхэгүй.

Энэ үдэр харгыда гарахада, баруун зүг руу муу, бэшэ тээшэ гэмгүй.

Хулгана, гахай жэлтэнэй һайн гараг; үхэр, луу, нохой жэлтэнэй буян үйлэдэхэ үдэр. Морин, могой жэлтэн һэргэг байхые оролдог.

Үһэеэ абхуулхада – һүнэһэн зайлаха.

Июлиин 24, гарагай 5, буряад-монгол литээр 30.

Бурхан багшын дүйсэн үдэр.

30-да айраг тариг бүрихэдэ һайн. Адуу малай үһэ нооһыень хайшалхые, эд бараа, худалдажа абахые, адуу мал хүнгэлхые, дэгэл хубсаһа эсхэхые, наһа барагшын, бэриин үйлэнүүдые бүтээхые тэбшэхэ.

Амгалан тайбанай, хүүгэдэй хэшэг даллага абахада һайн. Тахяа, үхэр, могой жэлтэй хүнүүдтэ хии мориёо хиидхэхэдэ һайн.

«Ниитын» үүдэн нээгдэнэ: суглаа зарлахагүй, шухала уулзалга эмхидхэхэгүй.

Энэ үдэр харгыда гарахада, зүүн зүг руу муу, бэшэ тээшэ зүглэхэдэ гэмгүй.

Бар, туулай жэлтэнэй урагшатай үдэр, харин тахяа, бишэн жэлтэнэй буян үйлэдэхэдэ һайн. Үхэр, луу, хонин, нохой жэлтэн һэргэг ябахые оролдохо.

Үһэеэ абхуулхада – хэрүүл аман дэлгэрхэ, аминда харша.

Июлиин 25, гарагай 6, буряад-монгол литээр шэнын 1.

Тэрсүүд ябаһан үдэр санваар хүртэхэ, харгыда гараха, нүүхэ ба бэриин үйлэ бүтээхэ, наһа барагшые хүдөө гаргаха үйлэнүүдые тэбшэхэ.

Шэнын 1-дэ замда гарахада, дэгэл хубсаһа эсхэхэдэ, газар хахалхада, таряа ногоо тарихада, эд бараа, адуу мал худалдан абахада, шэнэ гэр бодхооходо һайн. Адуу малай үһэ нооһыень хайшалхагүй, хүнгэлхэгүй, хүүр залахагүй.

Амгалан тайбанай, хониной хэшэг даллага абахада һайн.

«Айлшанай» үүдэн нээгдэнэ: айлшадые урихагүй.

Энэ үдэр харгыда гарахада, зүүн зүг руу муу, бэшэ тээшэ зүглэхэдэ һайн.

Хонин, тахяа, бишэн жэлтэнэй урагшатай, һайн үдэр; морин, бишэн жэлтэнэй буянай үдэр. Бар, туулай жэлтэнэй чисаа гараг – һэргэг ябаха хэрэгтэй.

 Үһэеэ абхуулхада – наһан хорохо.

 Июлиин 26, гарагай 7, буряад-монгол литээр 2.

2-то айраг тараг бүрихэдэ, эмнэлгэ эхилхэдэ, хубсаһа хунар эсхэхэдэ, пеэшэн табихада, газар хахалхада, таряа ногоо тарихада, эд бараа, адуу мал худалдан абахада һайн. Адуу малай нооһыень хайшалхые, адуу мал хүнгэлхые, замда гарахые тэбшэхэ.

Амгалан тайбанай, таряанай хэшэг даллага абахада һайн. Бар, морин, нохой жэлтэй хүнүүдтэ хии мориёо хиидхэхэдэ, һайн үдэр.

«Наймаанай» үүдэн нээгдэнэ: олзын хэрэг эрхилхэгүй.

Энэ үдэр «морин үхэхэ, эмээл хухарха» ушарһаа харгыда гарахада муу, илангаяа зүүн зүг руу.

Үхэр жэлтэнэй урагшатай гараг; бар, туулай жэлтэнэй буян үйлэдэхэ үдэр. Хулгана, гахай жэлтэндэ урагшагүй үдэр, һэргэг байха хэрэгтэй. 

Үһэеэ абхуулхада – үбшэндэ, хэрүүл аманда.

Июлиин 27, гарагай 1, буряад-монгол литээр 3.

Майдар хурал эхилхэ.

Тэрсүүд ябаһан үдэр санваар хүртэхэ, харгыда гараха, нүүхэ ба бэриин үйлэ бүтээхэ, наһа барагшые хүдөө табиха гэхэ мэтые тэбшэхэ.

3-да замда гарахада, хубсаһа хунар эсхэхэдэ, шэнэ гэр бодхооходо, газар хахалхада, таряа ногоо тарихада, малай нооһо хиргахада, эд бараа, адуу мал худалдажа абахада һайн. Худаг малтахада, бэриин үйлэнүүдые бүтээхэдэ муу.

 Энэ үдэр амгалан тайбанай, эдеэ унданай, баялигай, адуу малай хэшэг даллага абахада һайн.

 «Хүбүүнэй» үүдэн нээгдэнэ: хүүгэдэй шухала хэрэг бүтээхэгүй, үһыень абахагүй, гэрһээ холо эльгээхэгүй.

Энэ үдэр харгыда гарахада, урда зүг руу муу, бэшэ тээшэ зүглэхэдэ һайн.

Луу жэлтэнэй урагшатай, һайн гараг.