Хаанашье ажаллабал, ехэ амжалтатай

«Хүн болохо багаһаа, хүлэг бо­лохо унаганһаа» гэжэ буряад зон хэлсэдэг гээшэ ааб даа. Бу­ряад Уласай элүүрые хамгаал­гын һалбариин хүгжэхэ хэрэгтэ ехэ үүргэ бэелүүлһэн Валерий Вениаминович Кожевников хара багаһаа эмшэн болохые хүсэдэг байһан. Тиигэжэ эгсэ 40 жэлэй саана, 1985 ондо, Шэтын гүрэнэй медицинскэ институт дүүргэжэ, мэргэжэлтэ врач бо­лоо бэлэй.

 Дээдэ һургуулияа дүүргэһээр, 2002 он хүрэтэр Валерий Ве­ниаминович Улаан-Үдынгөө Түргэн туһаламжын больницада (БСМП) амжалтатай ажаллажа, олон хүнэй ами наһа абарһан габьяатай. Тэн­дэ хүдэлхэ үедөө Улаан-Үдын Горсове­дэй гэшүүнээр һунгагдажа, хотынгоо элүүрые хамгаалгын эмхинүүдые ажал­шадаар – врачуудаар болон медсестра­нуудаар хангаха асуудал шиидхэлсэһэн алдартай.

Ажалдаа тон харюусалгатайгаар хандадаг эмшэн хадаа Буряад Ула­сай габьяата врачай, мүн Оросой бо­лон Монголой габьяата врачай үндэр нэрэ зэргэнүүдтэ гүрэн түрын зүгһөө хүртэһэн байна.

Һанаһанаа бэелүүлдэг

Ахамад врачай тушаалда ажалла­хадаа, шэнэ технологинуудые нэбтэ- рүүлхые оролдодог һэн. 2002 ондо Бу­ряад Уласайнгаа элүүрые хамгаалгын сайдаар томилогдожо, 2017 он болотор горитой ажал ябуулһан байха юм. Ал­бан ажалайнгаа хажуугаар эрдэм шэн­жэлгын хүдэлмэришье ябуулһан. 2007 ондо медицинын эрдэмэй докторой нэрэ зэргэ хамгаалһан байна.

Гүрэн түрын үндэр тушаалһаа буугаад, Хорото хабдарай диспансерэй ажал хүдэлмэрииень һэргээһэн бэрхэ хүтэлбэрилэгшэ 2019 ондо хүршэ Үбэр Байгалай хизаарай элүүрые хамгаал­гын сайдай тушаалда зууршалагдаһан байха юм.

- Һонин гэхэдэ, Шэтэдэ хүдэлхэдөө, Үбэр Байгалай хизаарта коронавирус халдаһан түрүүшын хитад хүнтэй дай­ралдаа һэмби. Энээн тухаймни «60 ми­нута» гэһэн түбэй телевидениин дам­жуулга анха түрүүшынхиеэ бүхы Орос гүрэнөөр хөөрөө бэлэй, - гэжэ Валерий Вениаминович ковидой эхилһэн тухай тодорхойлон хөөрэбэ.

Үбэр Байгалай хизаарта амжалтатай һайнаар хүдэлһэнэй удаа 2020 ондо нютагаа бусаһан бэрхэ ударидагша Уушханай ханяаданда эсэргүүсэлгын Г.Д. Дугаровагай нэрэмжэтэ клиническэ диспансерэй ахамад врачаар томилог­доо.

Эрхим эмхинүүдэй дүхэриг соо

Бэрхэ хүтэлбэрилэгшын ударидалга доро эбтэй эетэй хүдэлжэ байһан Ууш­ханай ханяаданда эсэргүүсэлгын кли­ническэ диспансерэйхидэй оролдол­гоор туберкулёзтой зон үсөөржэ бай­на гэхэдэ, алдуу болохогүй бшуу. 2020 ондо энэ эмхи зургаан «Элүүр энхые хамгаалгын эрхим эмхи» гэжэ нэрлэг­дэбэ, тиин жэл бүри «Оросой Холбоото Уласай Элүүрые хамгаалгын эрхим ал­бан зургаан» болодог байна. 2022 оной дүнгөөр Бүхэроссиин Хүндэлэлэй ном­до оруулагдаа. Харин 2023 ондо Шана­рай талаар үндэһэтэнэй хүреэлэнэй тусгаар үнэмшэлгэдэ хүртэһэн байна.

Бидэ, «Буряад үнэнэйхид», тус дис­пансертэй хэлсээ хэһэн хадаа ехэ ду­ратайгаар Түнхэнэй Аршаанай сана­торидо (ахамад врачынь А.В. Осоров) бэеэ эмнүүлнэбди. Тэндэ ошожо, сэбэр агаараар амилха, гоё һайхан байгаа- лиинь уудамда сэнгэхэ аргатай бай- һандаа баяртайбди. Байгша оной фев­раль һара соо Аршаанай санаториин баян түүхыень сониндоо бэшэһэн бай­набди. Бэрхэ бэрхэ врачууд болон мед­сестрануудтань баһал баяр баясхалан хүргэнэбди.

«Элүүрые хамгаалгын урда габьяатай байһанай түлөө» медальда (2015 он), «Эсэгэ оронойнгоо урда габьяатай байһанай түлөө» II шатын орденой ме­дальда, (2012 он) хүртэһэн В.В. Кожев­ников эрдэмэй 22 хүдэлмэри, гурбан монографи бэшэһэн юм.

Сэдьхэл зүрхөө докторой үнэн сэхэ тангаригтаа зорюулжа, аша үрэтэйгөөр, тон оролдосотойгоор ажаллажа, тус диспансерые, мүн Аршаанай сана­ториие урагшатайгаар, урматайгаар ударидажа байһан бэлиг талаантай бодото врач, ухаатай сэсэн һурган хүмүүжүүлэгшэ, хүдэлмэриин баян дүршэлтэй Валерий Вениаминович­та ута наһа, удаан жаргал, элүүр энхые үреэнэбди!

Бэлигма ОРБОДОЕВА