Зүрхэ сэдьхэлэй уряагаар

Эрхыдээ эмтэй, долёобортоо домтой Сергей Бимбае­вич Цыденжапов Зэдын аймагай Белоозёрск нютагта ажаһуудаг Бимба Базаржапович Цыренцо Дашиевна хоёрой ехэ хүбүүн боложо, 1975 оной сентябриин 14-дэ мүндэлhэн намтартай. Эмшэн болохо хүсэлынь багаhаа хойшо элирһэн. Зунай сагта хониной нооhо хайшал­ха, хабартаа хүдѳѳгэй ажал хэхэ үедөө нүхэдэйнгөө гар хүлөө гэнтэ шулгалхадань гү, али гэмэлтээхэдэнь, түрүүшын туhа хэхэ гэжэ оролдодог, аргалhайб гэжэ досоогоо hанадаг байhан юм.

Тиигэжэ Сергей хүбүүн нютагайнгаа hургуули эрхимээр дүүргэhэнэй hүүлээр Шэтын гүрэнэй эмнэлгын академидэ ороһон байна. Тэрэ­нээ дүүргээд, 1999 онhоо 2003 он болотор Кабанскын айма­гай түбэй больницада хирургаар хүдэлөө. Яhа уhанай үбшэ зүбѳѳр тодорхойлжо абаад, хүн бүхэндэ эм дом тааруулжа үгэхэ гээшэ бэлэн хэрэг бэшэ юм ааб даа. Ажалдаа харюусалгатайгаар хандажа, бүхы арга шада­лаа дууhан үгэжэ байдаг Сер­гей Бимбаевич Улаан-Үдэ хото нүүгээд, БСМП-гэй эбэрэлгын травматологическа таhагые даагшаар 2003 онhоо 2021 он болотор амжалтатайгаар хүдэлhэн байна. Эндэ ажаллажа байхадаа, орёо хүндэ операци­нуудые бэрхээр хэдэг hэн. Тэрээнhээ гадна шархатаhан, гэмтэhэн эмнүүлэгшэ бүхэниие хүл дээрэнь гаргаха талаар ехэ дүй дүршэлтэй болоһон юм.

Сергей Бимбаевич эрдэм шэнжэлгын хуралдаануудта, семинарнуудта эдэбхитэйгээр хабаададаг, эмшэлхы дүй дүршэлѳѳрѳѳ хубаалдадаг, шэнэ үеын онол аргануудые нэбтэрүүлгын талаар эрдэм мэдэсэеэ улам hайжаруулжа байдаг заншал­тай. Һүүлэй жэлнүүдтэ 160-аад элдэб орёо операцинуудые ам­жалтатайгаар үнгэргэhэн, хүндэ үбшэндэ нэрбэгдэhэн нилээд олон зониие эмшэлhэн гээшэ. Тиигэжэ ажалдаа үндэр үрэ дүнгүүдые туйлаһанай түлөө 2016 ондо «Эрхим травматолог» гэhэн нэрэ зэргэдэ хүртэhэн юм.

2005 ондо наhанайнгаа нүхэртэй уулзажа, хуби заяагаа холбоо. Эхэ эсэгын баяр боложо, хоёр дали мэтэ хѳѳрхэн басагад мүндэлѳѳ юм. Мүнѳѳ ехэ басаганиинь Новосибирскын гүрэнэй эмнэлгын ехэ һургуулиин 3-дахи курсын оюутан. Багань - 10-дахи ангиин hурагша - алтан медаляар hургуулияа дүүргэжэ, эхэ эсэгынгээ мүрѳѳр эмшэнэй харгыда орохо гэжэ шадалаараа оролдожо байна.

Сергей Бимбаевич ковид үбшэнэй үе соо В.В. Ангаповай нэрэмжэтэ Ковидно түбтэ үрэ дүнтэйгѳѳр хүдэлѳѳ. 2022 онhоо Хориин аймагай түбэй эмнэл­гын газарай ахалагша врач бо­ложо ерэhэн байна. «Намhаа саагуур...» гэжэ бододоггүй, бэрхэшээлhээ айдаггүй, хүнэй урда ябадаг заншалтай хадаа 2024 ондо Екатеринбургын сэрэгэй клиническэ госпиталиин тусхай бүлгэмэй бүридэлдэ оро­жо, Луганска можо ошоһон юм. Тэндэ шархатаhан, хүндэ үб- шэндэ нэрбэгдэhэн сэрэгшэдэй ами наhа абарха хэрэгтэ үдэр hүни гэнгүй оролдожо, 150 га­ран операци хэhэн, олон хүниие хүл дээрэнь бодхооhон.

Брянка хотын 2-дохи отря­дай госпиталиин дарга, эмнэл­гын албанай подполковник А. Корниенко «Тусхай операцида алба хаагшадта үзүүлэгдэһэн элүүрые хамгаалгын hайн ша­нартай ажалай түлѳѳ» гэhэн Баярай бэшэгээр Сергей Бим­баевичиие шагнаhан байна. Нёдондо Буряадай Толгойлог­шо Алексей Цыденов Эсэгэ орондоо үнэн сэхээр алба хэhэн аша габьяаень, баатаршалгыень үндэрѳѳр сэгнэжэ, «Зүрхэ сэдь­хэлэй уряагаар» гэhэн гүрэнэй шагнал - медаль зүүлгээ юм.

Сергей Бимбаевич суг ажал­танайнгаа дунда хүндэтэй. Дүй дүршэлтэй, мүн залуушье мэр­гэжэлтэдтээ эсэгэ мэтээр ханда­жа, бүхы бии дүршэлѳѳрѳѳ ху- баалдажа байдаг юм.

Ямаршье сагта эмшэн хүнэй уялга тон үндэрѳѳр сэг­нэгдэдэг. Юундэб гэхэдэ, тэрэ ѳѳр дээрээ ехэл хүндэ ашаа үргѳѳд ябана ха юм. Эгээл тэрээнhээ хүнэй ажамидарал, саа­шанхи бэеын элүүр энхэ байдал дулдыдана гээшэ ааб даа.

Зоригма ЦЫБИКОВА