Балшар бага баатарнууд

Багаханшье һаа, баатаршалга гаргаһан үхибүүдые эндэ суглуулжа шагнадаг гээшэ. Энэ удаа 2025 ондо доро зүрхэтэй байһан зургаан хүбүүд, басагад Орос гүрэнэй медальнуудта хүртэбэ.

Орос гүрэнэй Федерациин зүблэлэй түрүүлэгшэ Валентина Матвиенко гэгшын гар табигдаһан «За проявленное мужество» гэһэн медальнууд барюулагдаа. Үхибүүдэй түрэлхид Баярай бэшэгүүдтэ хүртөө.

Буряад Уласай Арадай Хуралай Түрүүлэгшэ Владимир Павлов хүүгэдэй баатаршалга гаргахадань, ходо гайхадаг байһанаа мэдүүлнэ.

- Оршон тойронхи байдалда боложо байһан юумые хуу обёоржо ябаһандатнай баяртайбди. Тойроод байһан, илангаяа дүтынгөө хүнүүдтэ туһа нэмэри үзүүлхэ бэлэн байһанаа гэршэлээт. Өөһэдынгөө ами наһа хайрлангүй, орёо байдалда орогшодые абарһан байнат. Таанадаар омогорхонобди, булта бэрхэнүүдта. Харин түрэлхидтэ баяраа мэдүүлхэ хэрэгтэй, иимэ бэрхээр хүүгэдээ хүмүүжүүлжэ байна ха юмта даа, - гэжэ Владимир Павлов амаршалха зуураа тэмдэглээ.

Кабанскын аймагай Байгалай-Хүдэрын һургуулиин шаби Дарья Метелёва Байгал далайн эрье дээрэ элһэн доро орошоһон нэгэ басагые обёоржо, малтажа гаргаһан байна. 10 гаран жэлдэ дзюдо, самбо барилдаануудаар бэеэ һоридог басаган энэ ушарта нэгэшье мэгдээгүй, абаһаар лэ туһалхаяа гүйжэ ерээ.

Загарайн аймагай Онохой һууринда эдир заахан нүхэр басагад София Мыльникова Софья Овсянкина хоёр хаташаһан ногооной шатажа эхилхые обёоржо, һүжэрхэеэ байһан дүлэнтэ түймэрые өөһэдын хүсөөр байлгажархёо. Энэ ушарта ехэшүүл хажуугаарнь гарашаха байгаа гээд һанагдана.

Гараж соохи машина соо ороод наадажа байһан хоёр хүүгэд угаартажа, түймэртэ дүрэхэ байгаа. Баргажанай дунда һургуулиин һурагшад Сергей Авраменко, Максим Серебренников тэдэниие гаргажа үрдеэ. Врачуудай хэлэһээр, угаартаһан хүүгэд үшөө 3-5 минута тэндэ байбал, наһа барашаха байгаа.

Улаан-Үдэ хотын Зверосовхоз һууринда 55-дахи һургуулиин шаби Арюна Базарова түймэрһөө гурбан наһатай дүү басагаяа абараа. Тэрэнээ тэбэреэд гарашаһанайнь удаа гэрэй хушалта унашоо. Теэд олон жэлдэ тэжээжэ байһан миисгэйгээ гаргажа шадаагүйдөө халаглаад, Арюна мүнөөшье бархираад абана.

Энэ хэмжээ ябуулгада сэрэгэй тусхай үйлэ хэрэгүүдтэ хабаадаһан сэрэгшэд ерэжэ, амаршалгын үгэнүүдые хэлээ. «Баатаршалга гаргажа, хүн зоной урдаа хараха хүнүүд болоһон хадаа булта һургуулидаа бэрхээр һурагты, һайн сэгнэлтэнүүдые абагты», - гэжэ тэдэ уряалаа.

Борис БАЛДАНОВ