Оюутадай ажабайдал хүсэд харуулна

Шэнэ жэлэй амаралтын үдэрнүүдэй һүүлээр удааншье болонгүй, Хэблэлэй мэргэжэлтэдэй һайндэр тэмдэглэгдэнэ. Һүүлэй жэлнүүдтэ залуушуулые энэ һалбариин мэргэжэлдэ ехээр хабаадуулһаниинь һайшаалтай. Дээдэ гү, али дунда мэргэжэлэй һуралсалай гуламтануудта, һургуулинуудта медиа-түбүүд байгуулагдана.

Ерэхэ амаралтада, январиин 25-да, Орос гүрэнэй бүхы оюутадай һайндэр болоно. Тиимэһээ хоёр һайндэртэ дашарамдуулан, Михей Ербановай нэрэмжэтэ Буряадай аграрна колледжын медиа-түбтэй танилсуулхамнай.

Сагай эрилтэдэ таарамаар хүдэлхэ гэжэ хэдэн жэлэй саана медиа-түб байгуулха тухай шиидхэбэри абтаа һэн. Урид аграрна колледжын сайт болон сүлжээ холбооной хуудаһанууд дээрэ Елизавета Жаргаловна Балданова бэшэдэг, элдэб мэдээсэл тараадаг байгаа. Мүнөө үедэ Елизавета Жаргаловна һуралсалай гуламтын “госпаблигай” хүтэлбэрилэгшэ гээд тоологдоно. Тэрээнэй ажалда шэнээр байгуулагдаһан медиа-түбэйхид аргагүй ехээр туһа хүргэнэ. Тиимэһээ оюутад эмхиингээ ажабайдалые хүсэд харуулжа шадана гэхэдэ, алдуу болохогүй.

Медиа-түбтэ оюутадые суглуулха, тэдэниие һургаха хүнгэн бэшэ ажал информатикын багша Саяна Сергеевна Ширеторовада даалгагдаа. Колледжын захирал Цыденжап Григорьевич Шагдаров оршон байдалые ойлгожо, шэнэ оньһон техникэ, тэрэ тоодо фотоаппарат болон компьютер худалдан абаа, тусхай кабинедтэй болгоо. Бүхы Орос гүрэн дотор дунда ба дээдэ мэргэжэлэй һуралсалай гуламтануудта нэбтэрүүлэгдэжэ эхилһэн “Профессионалитет” гэһэн программа өөрын нүлөө үзүүлһэн байна.

- “Информационные системы обеспечения градостроительной деятельности” гэһэн шэглэлээр мэргэжэлтэдые 2022 онһоо манай колледж бэлдэжэ эхилээ. Тэдэнэй классай хүтэлбэрилэгшөөр томилогдооб. Мүнөө үхибүүдни дүүргэхэеэ ябана. Һаял медиа-түб байгуулха тухай зугаагай гаража байхада, бүлэгэйнгөө үхибүүдээр хүдэлжэ эхилээб. 1-дэхи курсын байһан Булат Балданов, Дмитрий Осоров, бидэ гурбан түрүүшын ажал бүтээжэ, сүлжээ холбооной хуудаһан дээрэ табяа һэмди. Эгээл эндэһээ манай түб эхиеэ абана. Харин 2023 ондо медиа-түб байгуулха тухай захиралта гараа һэн, - гэжэ Саяна Ширеторова мэдүүлнэ.

Бүхэроссиин хэмжээнэй урилдаанда тэдэ хабаадаха гэжэ шиидхэбэри абаа. Тиигэжэ тэдэнэй эгээл түрүүшын ажал үндэр сэгнэлтэдэ хүртөө. Орос гүрэнэй Болбосоролой яаманай болон Мэргэжэлтэ һуралсалые хүгжөөлгын институдай эмхидхэһэн урилдаанда тэдэ шангай 3-дахи һуури эзэлһэн байна. Бүхэроссиин хэмжээнэй диплом тэдэ Буряад Уласай болбосоролой болон эрдэм ухаанай сайд Валерий Поздняковой гарһаа абаа һэн. Тэрэ гэһээр элдэб түхэлэй урилдаан болон конкурснуудта 10 гаран диплом болон грамотануудта хүртэнхэй.

Мүнөө үедэ медиа-түбтэ заал һаа 10-15 оюутад хабаадуулагдана. Эдэмнай журналистикада хабаатай бэшэ мэргэжэлнүүдтэ һурадаг хүбүүд, басагад болоно бшуу. Хэды тиигэбэшье тэдэ булта өөрын уялгатай, даабаритай.

- Гэртээ өөрын компьютертай болоод, видео болон гэрэл зурагуудые яагаад буулгадаг бэ гэжэ һонирхожо эхилээб. Саяна Сергеевна багшатаяа монтаж хэжэ һурааб, мүн бусадшье нюусануудтай танилсаабди, - гэжэ Булат Балданов хэлэнэ.

Анастасия Цыбенова ба Алтана Батуева гэгшэд 2-дохи курсын оюутад юм. Ерээдүйдэ тэдэ программист болохо түсэбтэй.

- Багаһаа хойшо компьютераар һонирходогби. Түнхэнэй аймагай Шэмхын интернат-һургуулида һурахадаа, видеонуудые буулгажа, клипүүдые хэжэ туршадаг һэм. Тиихэдэ ниигэмэй сүлжээндэ өөрын аккаунттай байгааб. Тиишэнь лэ табигша бэлэйб. Аграрна колледж ороод, дуратай ажалаа үргэлжэлүүлнэб, - гээд, Анастасия Цыбенова хөөрэнэ.

Анастасия Алтана хоёр графическа дизайн яһала һайн мэдэнэ, хэмэл ухаанай болон нейросетиин хэрэгсэлнүүдые ашаглан, тусхай постнуудые бэшэнэ. Аграрна колледжын Хэжэнгын таһагта шэнэ мастерскойн нээгдэхэдэ, шадамар бэрхээр, гоёор мэдээсэл бэлдэжэ, тэрэнь олондо һайшаагдаа.

Амгалан Майдаров болон Кирилл Кокорин гэгшэд видео буулгадаг хүнүүд юм. Амгалан шадамараар концерт наада буулгана. Ерээдүйн агроном Кирилл бүхы юумэ буулгаха аргатай.

3-дахи курсын Александр Никифоров медиа-түбтэ онсо уялгатай. Тэрэ буряад хэлэн дээрэ мэдээсэлнүүдые бэлдэнэ, интервью абана. Мүн 2-дохи курсын Татьяна Ткачёва гоё һайхан зурагуудаар мэдээсэлнүүдые шэмэглэнэ.

Агрономиин таһагта 4-дэхи курсда һурадаг Александра Толстоброва жэлһээ үлүү медиа-түбэй ажалда хабаадана.

- Колледжын “Эрхим оюутан” гэһэн конкурсдо хабаадахаяа бэлдэжэ байгааб. Эгээл тэндэ өөр тухайгаа видео буулгажа, клип бэлдээд, һайхан үгэнүүдые бэшэхэ хэрэгтэй байгаа. Одоол тиихэдэ яһала үни интернет соо хэрэгтэй олон юумэ хаража, сурбалжалагшын ажал ойлгожо абааб. Саяна Сергеевна намайе медиа-түбтэ хабаадыш гэжэ дурадхаа, - гэжэ Александра Толстоброва хэлэнэ.

Александра хадаа һонинуудай текст зохёон бэшэнэ, интервью абана. Нэгэ жэлэй хугасаада мэдээжэ, үндэр тушаалтай олон хүнтэй харилсаа. Тэдэнэй тоодо, Орос гүрэнэй Алас Дурна болон Арктика хүгжөөлгын сайдай орлогшо Эльвира Нургалиева, Буряадай Толгойлогшо Алексей Цыденов, болбосоролой болон эрдэм ухаанай сайд Валерий Поздняков болон бусад болоно.

- 2025 ондо Соведүүдэй талмай дээрэ “Жить, учиться и работать в Бурятии!” гэһэн хуралдаанда бидэ хабаадаабди. Һуралсалай гуламтануудай медиа-түбүүд үглөөнэй 9 часһаа 12 час болотор форум тухай мэдээсэл бэлдэжэ, өөрын аккаунт дээрэ табиха гэһэн даабаритай байгаа. Бидэ тэрэ дороо буулгажа, монтаж хэжэ, гэрэл зурагуудые заһажа, текст зохёоһон байнабди. Тус хэмжээ ябуулгада заал һаа Буряадай Толгойлогшотой хөөрэлдэхэ гэһэн түсэб урдаа табяабди. Һанаһандаа хүрэжэ, Алексей Самбуевичтай яһала һонирхолтойгоор интервью хээбди, - гэжэ Александра Толстоброва нэмэнэ.

Аграрна колледжын медиа-түб сагай эрилтэдэ таарамаар хүдэлнэ. Юуб гэхэдэ, Шэнэ жэлэй үедэ совет үеын маягаар амаршалгын открытка хүн бүхэн сүлжээ холбоондо бэлдээ. Оюутадшье энээнһээ хойнтонгүй, колледжын захирал Цыденжап Григорьевичто баһа тиимэ маягаар амаршалга бэлдээ. Иигэжэ бүхэдэлхэйн трендһээ үлэнгүй ябажа, өөрын онсо маягтай ажал ябуулһандань баярламаар.