398
2026 оной июлиин 25-26-ай үдэрнүүдтэ Буряад Уласай Яруунын аймагай Эгэтын «Дамчой Равжелинг» дасанай 200 жэлэй ойдо зорюулагдаһан баярай хэмжээ ябуулга эмхидхэгдэхэ. Баян түүхэтэй дасанай ойн баяр үнгэргэхэ талаар бэлэдхэл мүнөө эхилэнхэй.
Эгэтын дасан 1820 ондо байгуулагдажа, 1826 ондо хуулиин ёһоор баталагдажа, Зүүн Сибириин буддын шажанай эгээл үнинэй түбүүдэй нэгэн болоно. 1934 ондо хаагдахаһаа урид энэ дасанда 12 дуган байһан юм.
Ойн баярай хэмжээндэ Оросой, Монголой, Түбэдэй буддын шажанай нэгэдэлнүүдэй түлөөлэгшэдэй хабаадалгатайгаар шажан мүргэлэй, соёлой хэмжээ ябуулганууд түсэблэгдэнэ.
Буян үйлэдэлгын марафон эмхидхэгшэд ороһон мүнгэнэй талаар бүхы зоной харахаар тоосоо эмхидхэнхэй. 2026 оной январиин 23-ай мэдээгээр, тусхай счёдто 88 167 түхэриг оронхой. Буян үйлэдэжэ, мүнгэ оруулха реквизидүүд Эгэтын дасанай телеграм-каналда толилогдонхой. Тиихэдээ мүнгэ ябуулхадаа, заатагүй «Благотворительность» гү, али «Пожертвование Эгитуйскому дацану» гэжэ бэшэхэ шухала. Юуб гэбэл, иимэ тэмдэггүйгөөр оруулһан мүнгэн хүрэжэ ошохогүйдөө болохо.
Тиихэдэ Сагаан һарын найрта болон Эгэтын дасанай 200 жэлэй ойн баярта зорюулагдаһан тоглолто-марафон (6+) февралиин 24-дэ Ород драмын театрта эмхидхэгдэхэ. Яруунын аймагай соёл уралигай эрхим уран бэлигтэн, зохёохы бүлгэмүүд болон эстрадын дуушад энэ хэмжээ ябуулгада хабаадаха. Сугларһан мүнгэн Эгэтын «Дамчой Равжелинг» дасанай 200 жэлэй ойн баярай бэлэдхэлдэ дамжуулагдаха. Гоё һайхан тоглолто хаража, буянта хэрэгтэ хубитаяа оруулалсахыетнай эмхидхэгшэд урина. Билет абаха талаар Улаан-Үдэдэ - 8 (983) 339-62-91, Яруунада - 8 (983) 335-31-94 гэһэн утаһануудаар холбоо барижа болохо.
Эмхидхэлэй хороон
«Яруунын аймаг» гэһэн нютагай засагай байгууламжын захиргаанай гэрэл зураг
