Арад зоной эрхим түлөөлэгшэд

Аяар холын 2008 ондо анха түрүүшынхиеэ болоһон тус урилдаан жэлһээ жэлдэ түрэлхи хэлэнэй багшанарта һайшаагдана. Эндэ амжалта туйлаһан багшанар нютаг нугануудтаа, түрэл һуралсалайнгаа гуламтануудта түрүү хүнүүдэй тоодо абаһаар лэ ороно, арад зонойнгоо дунда хүндэтэй болоно.

2024 ондо «Эрхим багша» гэһэн хүндэтэ нэрэ зэргэдэ хүртэһэн Буряадай Үндэһэтэнэй 1-дэхи лицей интернадай багша Светлана Владимировна Раданжапова Орос гүрэн дотороо шалгаржа, «Түрэл хэлэнэй болон түрэлхи уран зохёолой эрхим багша» гэһэн урилдаанда түрүүлжэ гараа һэн. Тиигэжэ 2025 ондо бүхы Орос гүрэнэй можо хизаарнуудай багшанар Улаан-Үдэдэ бүхэроссиин хэмжээндэ суглараа бэлэй. Үргэн дэлисэтэйгээр үндэр хэмжээндэ энэ урилдаан үнгэрөө гэжэ бүхы хабаадагшад тэмдэглээ. Тиимэһээ Буряадтаа болодог «Эрхим багша» ба «Эрхим хүмүүжүүлэгшэ» урилдаанууд бүри эршэтэйгээр эмхидхэгдэдэг болонхой гэхэдэ, алдуу болохогүй. Энэшье удаа урилдаанда сугларһан 34 хабаадагша һайнаар ойлгожо байна. Урда жэлдэ эрхимлэжэ, бүхэроссиин хэмжээндэ Буряадаа түлөөлһэн түрүү мэргэжэлтэд мүнөөнэй хэмжээндэ шүүгшэдэй һуури эзэлжэ, хабаадагша бүхэнэй түлөө һанаагаа зобоно.

Үсэгэлдэр, мартын 17-до Буряадай багшанарай колледжын дэргэдэ нээлгын баяр ёһолол үнгэргэгдэбэ. Һуралсалай гуламтын хатарай ансамбль Орос гүрэн дотор ажаһуудаг арадуудай хатар нааданай гүрлөө харуулхадань, абаһаар лэ ямар үйлэ хэрэгтэ урилдаан хабаатайб гэжэ ойлгуулаа. Орос гүрэн дотор үнгэржэ байһан Арадуудай нэгэдэлэй жэлдэ энэ хэмжээн зорюулагдана.

- Нэн түрүүн буряад хэлэеэ залуу халаанда заажа, һургажа байһан  багшанарта доро дохиноб. Юуб гэхэдэ, гэр гэртээ эхэ эсэгэ, үбгэн аба үхибүүдээрээ түрэл хэлэн дээрээ харилсажа байбалнь, багшанарай ажал аргагүй хүнгэн болохо һэн. Харин мүнөө хараад үзэхэдэ, тад ондоо байдал тогтонхой. Тиимэһээ таанад үхибүүдые түрэл хэлэндэнь һургаха гэжэ оролдожо ябанат. Долоон хоногто гурбан хэшээл үнгэргөөд, түрэл хэлэндэнь, бэшэгэй дүримдэ һургажархиха, уран зохёолтой танилсуулжархиха гээшэ юрын хүнэй дүүргээд орхихоор зорилго бэшэ. Уламжалан хэлэбэл, таанад арад зоноймнай эрхим түлөөлэгшэд болонот, арад зонойнгоо хуби заяа шиидхэжэ ябаһан хүнүүд ха юмта. Энэ ехэ үндэр, дааша дабашагүй үүргэтэй таанадта амжалта хүсэнэб, - гэжэ баярай үгэ соогоо Буряад Уласай Болбосоролой болон эрдэм ухаанай яаманай дэргэдэхи «Бэлиг» түбэй захирал Баир Балданов хабаадагшадта хандаба.

Буряад Уласай Толгойлогшо Алексей Цыденов бүхы оршон байдалые ойлгожо, буряад хэлэ зааха программада дамжуулһан мүнгэ хороохогүй гэжэ шиидхэбэри абаа һэн. Эндэ «Эрхим багша» гэһэн урилдаанай үүргэ бүри үндэр болобо. Баир Балдановай мэдүүлһээр, урилдаа үнгэргэлгэдэ үгтэһэн 500 мянган түхэриг дээрэ үшөө 300 мянган түхэриг нэмээгдэнхэй.

Урилдаан табан шатаһаа бүридэнэ. Түрүү һуури эзэлһэн эрхим багшанарай болон хүмүүжүүлэгшэдэй нэрэнүүд мартын 20-до элирүүлэгдэхэ.