Ажалайнь дүнгүүд анхарма ехэ

Конференцидэ Буряад Уласай түлөөлэгшэд, «Сэрэгшэ» түбэй Буряад Уластахи таһагай захирал Николай Собенников, буудалгын шэглэлээр бэлдэлгын хүтэлбэрилэгшэ, сэрэгэй тусхай үйлэ хэрэгэй ветеран Юрий Сушкеев ба «Зарница 2.0» нааданда 3-дахи һуури эзэлһэн командын ударидагша, курсант Егор Сошнянин гэгшэд хабаадаа.

Оросой Холбоото Уласай Засагай газарай Түрүүлэгшын орлогшо - Алас Дурнын тойрогоор Оросой Холбоото Уласай Юрэнхылэгшын бүрин эрхэтэ түлөөлэгшэ, «Сэрэгшэ» түбэй Адаглан харалгын зүблэлэй түрүүлэгшэ Юрий Трутнев конференци нээгээ.

- 2022 ондо Оросой Холбоото Уласай Юрэнхылэгшын даабаряар «Сэрэгшэ» түб байгуулхадаа, үндэр зорилго табиһан байнабди. Бидэ Эхэ орондоо дуратай, ямаршье сагта гүрэнөө аршалха бэлэн Оросой залуушуулай шэнэ үетэниие хүмүүжүүлхэеэ һананабди. Энэ ажал ябуулхын тула манда бата бэхи, найдамтай үндэһэ һуури бии - Советскэ Союз, бүхы дэлхэй фашизмһаа хамгаалһан манай элинсэгүүд ба абанар тухай дурасхаал мүнхэ. Сэрэгэй тусхай үйлэ хэрэгэй геройнуудай баатаршалганууд бултанда жэшээ болоно. «Сэрэгшэ» түбэй 200 гаран инструктор сэрэгэй тусхай үйлэ хэрэгтэ хабаадаа. Бүхыдөө 288 инструктор дайшалхы дүй дүршэлтэй, - гэжэ Юрий Трутнев хэлэбэ.

Юрий Трутневай хэлэһээр, ороной дэбисхэрэй бүрин бүтэн байлгада ба бэеэ даанги байдалда залуушуулай үүргэ ойлгуулха шухала. Тогтууригүй геополитическэ эрхэ нүхэсэлдэ ба мэдээсэлэй талаар дайнай үедэ Орос гүрэндэ эрдэм мэдэсэтэй эрхэтэдһээ гадна ганса буу барижа, үндэһэтэнэй ашаг һонирхол хамгаалха бэшэ, харин Эхэ оронойнгоо һалбархын түлөө өөрынгөө тала харангүй, бэеэ гамнангүй хүдэлхэ бэлэн зон хэрэгтэй. «Сэрэгшэ» түб энэ бодолго бэелүүлхэ, залуушуулые Эхэ ороншоор, Эсэгэ ороноо хамгаалагшын үзэл суртал хүмүүжүүлхэ гол зэбсэг болоно.

Мүнөөдэр Оросой Холбоото Уласай 21 нютаг можодо түбэй таһагууд хүдэлнэ.

- Бидэ мүнгэн зөөриин талаар хизаарлалтануудай байгаашье һаа, «Сэрэгшэ» түб хүгжөөхэбди. Мүнөө жэлдэ үшөө гурбан таһаг нээгдэхэ. Бидэ инструкторнуудай ба курсантнуудай эрдэм мэдэсэ, дүй дүршэл дээшэлүүлхые оролдохобди. «Сэрэгшэ» түбэй ударидагшада би хандажа, «кибербезопасность» гэжэ шэнэ шэглэл нэбтэрүүлхыень гуйгааб. Орос гүрэнөө улам хүсэтэй болгохо, хүбүүд басагадые ямаршье бэрхэшээлнүүдые, аюул заналнуудые дабажа һургаха гээшэ  манай хамтын бодолго. Энэ хэрэг бэелүүлхэбди, - гэжэ Юрий Трутнев тэмдэглээ.

- Дайсан залуу үетэнэй ухаан бодолдо нүлөө үзүүлхэ һэдэлгэ гаргана. Залуушуулда уг залгамжын баялиг дамжуулха гээшэ «Сэрэгшэ» түбэй гол бодолгонуудай нэгэн, - гэжэ Оросой Юрэнхылэгшын Захиргаанай Хүтэлбэрилэгшын 1-дэхи орлогшо, «Сэрэгшэ» түбэй Адаглан харалгын зүблэлэй гэшүүн Сергей Кириенко тэмдэглэбэ.

- 100 мянга гаран курсант түбтэ һуража гараа. Тэдэнэй олониинь фронтын урда талада түбэй инструкторнуудтай хамта Эхэ ороноо түлөөлнэ. Сэрэгэй тусхай операциин ветерануудта, геройнуудта баяр хүргэнэб. Тэдэ Эхэ орондоо дуратай байха юун гээшэб гэжэ гэршэлээ, фронтын урда талада эрэлхэг зориг харуулаа. Тусхай үйлэ хэрэгэй газарһаа бусаад, мэдээсэлэй дайнай урда талада дахяад гараа. Ургажа ябаа залуу үетэнэй ухаан бодолой түлөө тэмсээн баһал байлдаанай талмай болоно. Дайсан нэн түрүүн хүүгэдые, ургажа ябаа залуу үетэниие сохино. Мүнөөдэр уг залгамжын баялигуудые, геройнуудай, Эхэ орондоо дуратай зоной бата үзэл Орос гүрэнэй удаадахи үетэндэ дамжуулха бодолго улам шухала болоод байна. Энэ хадаа манай гүрэнэй ерээдүйдэ хубита болоно, - гэжэ Сергей Кириенко тэмдэглээ.

Гүрэнэй Дүүмын һунгамал, ЛНР-эй Герой, Эрэлхэг зоригой орденой кавалер, «Сэрэгшэ» түбэй Хүтэлбэриин Түрүүлэгшэ Виктор Водолацкий «Сэрэгшэ» түбэй гурбан жэлэй ажалай дүнгүүдые согсолоо, 2026 оной гол бодолгонуудые тодорхойлоо. 90-ээд онуудай эхиндэ Орос гүрэндэ сэрэгэй ба тамирай талаар бэлдэлгын системэ байгаагүй, залуушуулые хүмүүжүүлгын ажал ябуулагдаагүй гэжэ Виктор Водолацкий элидхэл соогоо тэмдэглээ.

Эхэ ороншоор хүмүүжүүлгын системэ һэргээхын тула Оросой Юрэнхылэгшэ Владимир Путин «Сэрэгшэ» түб байгуулха даабари үгөө. Түб Эхэ орондоо дуратай, Эхэ ороноо хамгаалжа шадаха шэнэ үетэниие бэлдэхэ зорилготой.

- Мүнөөдэрэй байдалаар «Сэрэгшэ» түбэй таһагууд холбоото уласай бүхы тойрогуудта хүдэлнэ, тэрэ тоодо Оросой бусаагдаһан түүхэтэ нютаг можонуудта. Мүнөө жэлдэ Амарай можодо, Примориин хизаарта, Карелидэ үшөө гурбан таһаг нээгдэхэ. Манай программын ёһоор зунай элүүржүүлгын лагерьнуудта «Эдир геройнуудай саг» гэжэ Эхэ орондоо дуратайгаар хүмүүжүүлгын халаанууд нээгдэхэ. 2023 онһоо хойшо энэ программа 30 мянга гаран курсант шудалаа. 2024 онһоо Волгоград хотодо нютаг можо хоорондын «Эдир геройнуудай саг» гэжэ халаан үнгэргэгдэнэ. ДНР-эй, ЛНР-эй, Запорожско, Херсонско, Белгородско ба Волгоградска можонуудай хүбүүд басагад, дүн хамта 5,5 мянган хүн энэ халаанда хабаадаа, - гэжэ Виктор Водолацкий тэмдэглээ.

«Сэрэгшэ» түбэй Хүтэлбэриин Түрүүлэгшын хэлэһээр, мүнөөдэр Оросой 14 нютаг можын 30 гаран ехэ һургуули, тэрэ тоодо Москвагай, «Сэрэгшэ» түбтэ һуража гараһан залуушуулда ЕГЭ-гэй нэмэлтэ 10 хүрэтэр балл үгэнэ. Тиигэжэ курсантнууд туһатай дадал шадабари абахаһаа гадна саашанхи һуралсалай ба ажалаар дэбжэлгын шэнэ аргануудта хүртэнэ. Энэ хадаа «Сэрэгшэ» түбэй программануудые шудалһан зондо аргагүй ехэ дэмжэлгэ болоно. 2023-2024 онуудта «Сэрэгшэ» түбэй түрүүшын программанууд байгуулагдажа, саашадаа нэбтэрүүлэгдэһэн байна. 2025 ондо программануудые гуримшуулха хэрэгтэ ехэ анхарал хандуулагдаа. Болбосоролой дисциплинэнүүд табан шэглэлээр хубаарилагдаа, тэдэнэй тоодо Оросой Дайшалхы снайпингын федерацитай хамта бэелүүлэгдэдэг «Снайпинг». Эгээ һайн бэлдэлгэтэй курсантнуудта «Амиды үлэлгэ ба тагнуул» гэжэ программа оруулагдаа. 2026 ондо болбосоролой системын байгуулга түгэсэхэ. Программада оруулагдаһан шэнэ ёһо журам гэхэдэ, тамирай талаар бэлдэлгэ бэеэ дааһан шэглэл болгогдоо.

«Сэрэгшэ» түбэй захирал Дмитрий Шевченкын тэмдэглэһээр, сэрэгэй тусхай үйлэ хэрэгтэ хабаадагшадай дурасхаал мүнхэлхын тула Оросой Юрэнхылэгшын даабаряар түбэй таһагуудта Эсэгэ ороной Геройнуудай нэрэ олгогдоно.

- Мүнөөдэрэй байдалаар Геройнуудай нэрэ олгохо талаар баярай хэмжээ ябуулганууд түбэй 13 таһагта үнгэргэгдөө. Олониитын ба залуу үетэнэй түлөөлэгшэд, түрэлхид хэмжээ ябуулгада уригдаа. 2026 ондо «Сэрэгшэ» түбэй үшөө найман таһагта Геройнуудай нэрэ олгогдохо, мүнөө бэлдэлгын ажал ябуулагдажа байна, - гэжэ Дмитрий Шевченко хөөрэбэ.

Конференцидэ Оросой гэгээрэлэй сайд Сергей Кравцов, Оросой эрдэм ухаанай ба дээдэ болбосоролой сайд Валерий Фальков, холбоото уласай гүйсэдхэхы засагай зургаануудай ба залуушуулые Эхэ орондоо дуратайгаар хүмүүжүүлгын олониитын эмхи зургаануудай хүтэлбэрилэгшэд, тэдэнэй орлогшонор, «Сэрэгшэ» түбэй нютаг можонуудай таһагуудай захиралнууд, һуралсалай үедэ амжалта туйлаһан курсантнууд  хабаадаа.