​Буряад-монгол зурхай апрелиин 13-һаа 19 болотор

Апрелиин 13, гарагай 2, буряад-монгол литээр 26.

26-да айраг тараг бүрихэдэ, адуу мал һургахада, нооһыень хайшалхада, газар хахал­хада, таряа ногоо тарихада һайн. Замда гара­хые, дэгэл хубсаһа эсхэхые, эд бараа, адуу мал худалдан абахые, худалдахые, аралжаа най­маа ябуулхые, гэр байра барихые, тушаалда дэбжүүлхые тэбшэхэ.

«Хэрэмэй» үүдэн нээгдэнэ: гэрэй һуури татахагүй.

Энэ үдэр «морин үхэхэ, эмээл хухарха» ушарһаа харгыда гарахада муу, илангаяа зүүн зүг руу.

Амгалан тайбанай, баялигай, малгайн, гу­талай, хубсаһанай хэшэг даллага абахада; га­хай, хонин, туулай жэлтэй хүнүүдтэ хии мориёо хиидхэхэдэ, һайн үдэр.

Нохой жэлтэндэ һанаһанаа бүтээхэдэ ураг­шатай, хонин жэлтэнэй буянай гараг.

Үһэеэ абхуулхада – жаргалда.

Апрелиин 14, гарагай 3, буряад-монгол литээр 27.

27-до айраг тараг бүрихэдэ, замда гарахада, газар хахалхада, таряа ногоо тарихада, пеэшэн табихада, хүүр залахада һайн. Бэриин үйлэ бүтээхые, шэнэ гэр барихые, уһанай далан, хаалта бодхоохые, адуу малай үһэ нооһыень хайшалхые, дэгэл хубсаһа эсхэхые, эд бараа, адуу мал худалдажа абахые, худалдахые тэбшэхэ.

«Бэриин» үүдэн нээгдэнэ: бэриин хэрэг үйлэдэхэгүй.

Энэ үдэр харгыда гарахада, урда зүг руу муу, бэшэ тээшэ зүглэхэдэ һайн.

Амгалан тайбанай, баялигай хэшэг даллага абахада; хулгана, луу, бишэн жэлтэй хүнүүдтэ хии мориёо хиидхэхэдэ, һайн үдэр.

Морин, могой жэлтэнэй урагшатай үдэр; хулгана, гахай жэлтэнэй буян үйлэдэхэ гараг. Тахяа, бишэн жэлтэндэ муу үдэр, һэргэг ябаха хэрэгтэй.

Үһэеэ абхуулхада – үлзытэй.

Апрелиин 15, гарагай 4, буряад-монгол литээр 28.

28-да гал тахихада, уһанай хаалта, далан бодхооходо һайн. Адуу малай үһэ нооһыень хайшалхагүй, эд бараа, адуу мал худалдажа абахагүй, дэгэл хубсаһа эсхэхэгүй, замда гарахагүй, тушаалда томилхогүй, бэриин, наһа барагшын үйлэнүүдые бүтээхэгүй.

«Үхээриин» үүдэн нээгдэнэ: хүүр залахагүй.

Энэ үдэр харгыда гарахада, баруун зүг руу муу, бэшэ тээшэ зүглэхэдэ һайн.

Амгалан тайбанай, мориной хэшэг даллага абахада; бар, морин, нохой жэлтэй хүнүүдтэ хии мориёо хиидхэхэдэ һайн.

Хулгана, гахай жэлтэнэй урагшатай, һайн үдэр; үхэр, луу, нохой жэлтэнэй буянай үдэр. Морин, могой жэлтэнэй чисаа гараг – һэргэг ябаха хэрэгтэй.

Үһэеэ абхуулхада – хэрүүл аман дэлгэрхэ.

Апрелиин 16, гарагай 5, буряад-монгол литээр 29.

Нирманарати замбиһаа бурхад буужа, хүн зоной үйлэ хэрэгүүдые сэгнэдэг.

29-дэ дайсаниие номгодхохо, ада шүдхэр да­раха, гүү бариха, мал гаргаха, агнаха хэрэгүүдтэ һайн. Бэриин, наһа барагшын хэрэгүүдые үйлэдэхэдэ, дэгэл хубсаһа эсхэхэдэ, адуу малай үһэ нооһо хайшалхада, эд бараа, адуу мал ху­далдахада, аралжаа наймаа ябуулхада, найрла­хада, тушаалда дэбжүүлхэдэ муу.

«Үхэлэй» үүдэн нээгдэнэ: наһа барагшын хэрэгүүдые үйлэдэхэгүй.

Энэ үдэр харгыда гарахада, баруун зүг руу муу, бэшэ тээшэ гэмгүй.

Амгалан тайбанай, хүүгэдэй хэшэг дал­лага абахада һайн. Тахяа, үхэр, могой жэлтэй хүнүүдтэ хии мориёо хиидхэхэдэ һайн.

Бар, туулай жэлтэнэй урагшатай үдэр, харин тахяа, бишэн жэлтэнэй буян үйлэдэхэдэ һайн. Үхэр, луу, хонин, нохой жэлтэн һэргэг ябахые оролдохо.

Үһэеэ абхуулхада – һүнэһэн зайлаха.

Апрелиин 17, гарагай 6, буряад-монгол литээр 30.

Бурхан багшын дүйсэн үдэр.

30-да айраг тараг бүрихэдэ, худалдаа наймаанда һайн. Адуу малай үһэ нооһыень хайшалхые, эд бараа, адуу мал хүнгэлхые, худалдажа абахые, дэгэл хубсаһа эсхэхые, гэр бараа барихые, наһа барагшын, бэриин үйлэнүүдые бүтээхые тэбшэхэ.

«Ниитын» үүдэн нээгдэнэ: суглаа зарлахагүй, шухала уулзалга эмхидхэхэгүй.

Энэ үдэр харгыда гарахада, зүүн зүг руу муу, бэшэ тээшэ зүглэхэдэ гэмгүй.

Амгалан тайбанай, хониной хэшэг даллага абахада һайн.

Хонин, тахяа, бишэн жэлтэнэй урагшатай, һайн үдэр; морин, бишэн жэлтэнэй буянай үдэр. Бар, туулай жэлтэнэй чисаа гараг – һэргэг ябаха хэрэгтэй.

Үһэеэ абхуулхада – хэрүүл аман дэлгэрхэ, аминда харша.

Апрелиин 18, гарагай 7, буряад-монгол литээр шэнын 1.

Амгалан жаргалантай үлзы хутагта Дашаниматай үдэр абишиг (Ваан) хайрлахада, һайтар байгуулхада (рамнай үргэхэдэ), бурханай тахилга хэхэдэ һайн.

Шэнын 1-дэ һанаһанаа бүтээхэдэ, замда гарахада, дэгэл хубсаһа эсхэхэдэ, газар хахалхада, таряа ногоо тарихада, хуряахада, эд бараа, адуу мал худалдан абахада, худалдахада, шэнэ гэр бодхооходо, худаг малтахада һайн. Адуу малай үһэ нооһыень хайшалхагүй, хүнгэлхэгүй, хүүр залахагүй.

«Айлшанай» үүдэн нээгдэнэ: айлшадые урихагүй.

Энэ үдэр харгыда гарахада, зүүн зүг руу муу, бэшэ тээшэ зүглэхэдэ һайн.

Амгалан тайбанай, таряанай хэшэг даллага абахада һайн. Бар, морин, нохой жэлтэй хүнүүдтэ хии мориёо хиидхэхэдэ, һайн үдэр.

Үхэр жэлтэнэй урагшатай гараг; бар, туулай жэлтэнэй буян үйлэдэхэ үдэр. Хулгана, гахай жэлтэндэ урагшагүй үдэр, һэргэг байха хэрэг­тэй.

Үһэеэ абхуулхада – наһан хорохо.

Апрелиин 19, гарагай 1, буряад-монгол литээр 2.

2-то айраг тараг бүрихэдэ, эмнэлгэ эхилхэдэ, хубсаһа хунар эсхэхэдэ, барилга эхилхэдэ, пеэшэн табихада, газар хахалхада, таряа ногоо тарихада, эд бараа, адуу мал худалдан абахада һайн. Адуу малай үһэ нооһыень хайшалхые, адуу мал хүнгэлхые, замда гарахые тэбшэхэ.

«Наймаанай» үүдэн нээгдэнэ: олзын хэрэг эрхилхэгүй.

Энэ үдэр «морин үхэхэ, эмээл хухарха» ушарһаа харгыда гарахада муу, илангаяа зүүн зүг руу.

Энэ үдэр амгалан тайбанай, эдеэ унданай, баялигай, адуу малай хэшэг даллага абахада һайн.

Луу жэлтэнэй урагшатай, һайн гараг.

Үһэеэ абхуулхада – үбшэндэ, хэрүүл аманда.

Жаргал лама ДУГДАНОВ бэлдэбэ