Малай тэжээл – шэнэ аргаар

Очир Жигжитов гэһэн олзын хэрэг эрхилэгшэ яһа-мяханай талха үйлэдбэрилжэ гаргадаг үндэр хүгжэлтын Хитадай оньһото техникэ худалдажа абаад, ябуулхаяа бэлдэнэ.

Тус оньһото механизмын хүдэлжэ эхилхэдэ, хүдөө ажахын био-үлэгдэл ба хаягдалнуудые ашаглан болбосоруулгын талаар ехэ хүндэ бэрхэшээлтэй асуудалнууд шиидхэгдэхэ ушартай. Мүн лэ олондо хэрэгтэй ба үлтэй хоолтой малай тэжээл үйлэдбэрилэгдэжэ эхилээд, хүдөө ажахын хүгжэлтэдэ һайн хубилалтанууд болохоор хараалагдана.

Очир Жигжитов “Наследие” гэһэн компаниин байгуулагша болоно. Тэрэ шэнэ үйлэдбэриингээ хэмжээндэ 5 мянган эбэртэ бодо малай тэжээл болбосоруулан гаргаха ба мал үүсэлэлгын тусхай пункт бариха түсэбтэй. Олон толгой мал үүсэлжэ  мяхашалгын үйлэдбэридэ амитадай ехээр суглардаг яһануудые болбосоруулан эдеэшүүлгын талаар ехэ бэрхэшээлнүүд ушаралдадаг байгаа гэжэ эли.

Мүнөө абтаһан шэнэ оньһото механизм амитадай яһануудые халуун ууралаар зөөлэрүүлжэ, тусхай хүндэ даралтын аргаар бутаргажа, ямаршье үлэгдэлгүй һайнаар гурил талханай янза шэнжэтэй болгохо аргатай юм. Тодхогдоһон агрегадай дүрбэлжэн тэбхэр түхэлтэй мантан томо амһарта соонь нэгэ дары табан тонно яһан багтадаг. Тэдэниие зургаан часай туршада ууралаар халаажа болбосоруулдаг гуримтай.

Тиимэ аргаар жэжэхэнээр нюдэгдэһэн яһанай порошок үйлэдбэрилэгдэжэ, ургамалай һайн үтэгжүүлгэ (удобрени) болон малай ба миисгэйн, нохойн тэжээл һайтай эдеэ хоол гаргагдаха юм.

Аппарадые ханган ябуулхын тулада оройдоол нэгэ мэргэжэлтэ оператор хэрэгтэй ха. Тус түһөө түсэл Засагай газарай хэмжээндэ ехэ дэмжэлтэдэ хүртэһэн байна. Тэрэнэй бэелүүлгын асуудалаар Буряад Уласай Засагай газарай Түрүүлэгшын орлогшо, Хүдөө ажахын яаманай сайд Амгалан Дармаев ба Хитадай “Сенситар” гэһэн үйлэдбэрилгын компаниин генеральна директор Ван Цзесинг хоёр уулзажа, хэлсээнүүдые баталһан байна.

- Мүнөө Россельхоз-хиналта гэһэн албанай эрилтээр бүхы тээ блочно гэдэг томо хэһэгүүдээр мяхые элдэн эбдэдэг гуримтай болоһон. Тэрэнэй һүүлээр туйлай ехэ яһанууд үлэдэг ушартай. Манай уласта мяха үйлэдбэрилгын олон үйлэдбэринүүд бии, тэдэнэртэ яһануудые болбосоруулан эдеэшүүлгын талаар хэрэг илангаяа эрид шухала асуудалнуудай нэгэн болоно.

Тиимэһээ бидэ өөһэдын зүгһөө энэ шухала хэрэг эхилһэн олзын хэрэг эрхилэгшэдэ хэрэгтэй экспертизэнүүдые гараха, таарама зохид газар талмай бэдэржэ олохо болон бусад эмхидхэлгын асуудалнуудые шиидхэхэдэнь туһаламжа үзүүлхэбди, - гэжэ Амгалан Дармаев хэлэнэ.

Шэнэ үйлэдбэриин түхеэрэлгэ байгша оной сентябрь һарада тодхогдон ябуулагдаха түсэбтэй.

Баярма БАТОРОВА бэлдэбэ