444
Ангуушад шоно хюдаһанай түлөө яһала һайн мүнгэнэй дэмжэлгэ абажа эхилээ. Ахын аймагай һанһаа тэдээндэ нэгэ толгойн түлөө 8 мянган түхэриг үгтэнэ. Мүн уласай бюджедһээ үшөө 8 мянган нэмээгдэнэ.
Һүүлэй үедэ бүхы Буряад Уласай дэбисхэртэ шоно арьяатанай тоо олошоржо, тэдэнэр зоной адуу малда добтолдог болоо. Адуу мал таһалжа хаяна, хүнүүдэй гэрнүүдтэшье айнгүй хүрэдэг болоһониинь аймшагтай.
2021 оной эхинһээ абаад, Ахын аймагай ангуушад 148 толгой шоно буудаад байна. Тэдэниие хюдаха тусхай саарһа дансанууд зүбөөр бэшэгдэнхэй, шонын арһан бүхэн тамгалагдаад, бэень шалгагдаад, тушаагдаа.
Һаяхана Бурприроднадзорой мэргэжэлтэд Марина Дамдинова хүтэлбэрилэгшэтэеэ Ахын аймагаар албанай хэрэгээр ябахадаа, ангуушадтай, захиргаанай болон сомонуудай мэргэжэлтэдтэй уулзалга үнгэргөө. Гүрэнэй байгаали хамгаалгын хуули эбдэнгүй, ямар ушарта, хаана ябахадань шоно буудахаб гэһэн һонирхолтой ойлгууламжын хөөрэлдөөн болоһон байна.
Һүүлэй үедэ шононуудай олошорһоной ушарһаа боложо, Ахын ангуушадта жэлэй дүүрэтэр үшөө 50 толгой хюдаха арга олгогдоо.
«Аха» сонинһоо
