Хүдөө ажахыда хүдэлхэ

Программада хабаадагшад 2,5 һарын тур­шада фермерэй ажалай нюусануудтай танилсаха. 2024 ондо 30 хүн энэ программаар һураха, тэрэ тоодо сэрэгэй тусхай операци­да хабаадаһан гурбан хүн. Тиихэдэ сэрэгэй тусхай операцида хабаадагшын наһанай нүхэр мүн энэ программада оролсохо юм.

- Фермер болохо үнинэй хүсэлтэй байгааб. Ивалгын аймагта нэгэ багахан ажахытайб. Би хүдөө нютагта томо болооб, тэндэхи ажал тон һайн мэдэхэб. Өөрөө хүдөө ажахын мэргэжэлтэйб. Сэ­рэгэй тусхай операцида хабаадажа байхадаа, ажа­байдалай үнэтэ зүйлнүүд тухай ехэтэ бодомжол­дог һэм. Мүнөө хүсэлөө бэелүүлхэмни, хүдөөгэй ажал эрхилхэ гэжэ шиидээб. Мал ажалай шэглэл үшөө шэлэжэ абаадүй байнаб, - гэжэ сэрэгэй тус­хай үйлэ хэрэгүүдтэ хабаадагша Андрей Кондра­тьев хөөрэнэ.

Болбосоролой программада хабаадагшад те­оретическэ бэлэдхэл гараха, эрхэ хуулиин, мар­кетингын асуудалнуудые үзэхэ, хүдөө ажахыда нэбтэрүүлэгдэжэ байһан шэнэ арга зүйнүүдтэй танилсаха. Ерээдүйн фермернүүд хүдөө ажахын үйлэдбэринүүдтэ эрдэм мэдэсэеэ бэхижүүлхэ юм. Түгэсхэлдэнь тэдэ бизнес-түсэбүүдээ хамгаалха.

- Мүнөө сагай фермер нэгэ доро хүтэлбэрилэгшын, мүнгэн һангай мэргэжэлтэнэй, юристын, агрономой, малай аргашанай үүргэ дүүргэжэ шадаха ёһотой. Ехэнхидээ фермер боложо байһан зон һү, мяха үйлэдбэрилхэ арга зүйнүүдые муугаар мэдэхэ байдаг. Мүнгэн зөөриин, олзын хэ­рэгэй талаар мүн эрдэм мэдэсэ хэрэгтэй ха юм. Тиимэһээ тус һургуули манай фермернүүдтэ туһалха, тэдэниие дэмжэхэ, Буряад ороной хүдөө ажахын саашанхи хүгжэлтэдэ түлхисэ үгэхэ зорил­готой, - гэжэ Буряад Уласай Хүдөө ажахын ба эдеэ хоолой сайдай орлогшо Евгений Цыбиков тэмдэ­глэбэ.

Гурбан жэлэй хугасаа соо «Фермерэй һургуули» 106 мэргэжэлтэниие бэлдэжэ гаргаа. Тэдэнэй до­лоониинь «Бага ба дунда олзын хэрэг» гэһэн үндэһэтэнэй түсэлөөр Буряад Уласай Хүдөө ажа­хын ба эдеэ хоолой яаманай грант шүүһэн байна. Үшөө долоон хүн Россельхозбанкын грант шүүгээ гэжэ тэмдэглэлтэй.

Россельхозбанк, Филипповэй нэрэмжэтэ Буряадай гүрэнэй хүдөө ажахын академи, Буряад Уласай Хүдөө ажахын ба эдеэ хоолой яаман тус хэмжээ ябуулга эмхидхэнэ.