Далижуулан табидаг багша

Вячеслав Елбаев Усть- Ордын тойрогой Оhын аймагhаа ерэжэ, Чай­ковскиин нэрэмжэтэ хүгжэмэй училищи ороhон, Россиин Фе­дерациин габьяата зүжэгшэн Вера Дашиевна Лыгденова­гай хүтэлбэри доро дуунай hуралсал гараа, удаань Ленин­градай консерватори дүүргэжэ, түрэл театртаа хүдэлжэ эхилhэн. 1964 ондо тэрэ үедэ соёлой министр байhан Дамба Зодбич Жалсараевай дурадха­лаар хүгжэмэй училищида баг­шалжа эхилhэн.

Таби гаран жэлэй туршада Буряадайнгаа бэлигтэй дууша­дые эрхим hайнаар hургажа, одото орьёл өөдэ далижуулан табидаг багша, Россиин соёлой габьяата хүдэлмэрилэгшэ, Хүндэлэлэй орденой кавалер Вячеслав Баяндаевич Елбаев мартын 10-да 85 наhатай болобо.

Заншалта ёhоор табан жэлэй удаа Вячеслав Елбае­вай ойн баярай концерт Бу- ряадай Оперо болон баледэй театрай ордон соо үндэр хэм­жээндэ үргэн дэлисэтэйгээр үнгэргэгдэдэг юм. Чайковскиин нэрэмжэтэ соёл урлалай колледждо багшалхадаа, Вя- чеслав Баяндаевич хэдэн үеын дуушадые hурган гаргаа. «Манай абамнай мэтэ» гээд лэ, hурагша бүхэниинь, тэдэ­нэй тоодо Новосибирскын оперо болон баледэй театрай дуушан, Буряад Уласай ара­дай артист Шагдар Зондуев хүндэлэн хэлэдэг байна.

Багшынгаа нэрэ соло дуудажа, Новосибирск, Крас­ноярск, Москва болон бусад хотонуудhаа шабинарынь ойн баярай үдэшэдэ сугларха. Буряадаймнай бүхы мэдээжэ дуушад эдэ үдэрнүүдтэ «Сэдь­хэлэйм дуун» гэhэн концертдэ хабаадаха. Мартын 14-дэ Ж.Бизегэй «Кармен» оперодо түрүү дуушад уран бэлигээ баг­шадаа, харагшадтаа бэлэглэхэ, үглөөдэрынь Гала-концерт Оперо болон баледэй театрай ордон соо үнгэрхэ байна.