“Алтарганада” бэлэдхэл эхилэнхэй

Буряад Улас дотор уласхоорондын “Алтаргана” фестивальда шэлэн абалгын шата эхилбэ. Эдэ үдэрнүүдтэ гэрэл зурагуудай харалганай эхин шата соносхогдожо, ямаршье хүн хабаадаха аргатай байна.
2018-2021 онуудай хугасаада буулгагдаһан гоё, зохид, удхатай гэрэл зурагуудые  дурадхаха хэрэгтэй.  «Минии түрэл нютаг» болон  «Буряад арад» гэһэн хоёр номинацинуудаар харалган үнгэрхэ. Нэгэ хүн нэгэ шэглэлээр 5 зураг эльгээхэ болоно.

Эдэ номинацинуудта таараха, зохид гэрэл зурагуудаа онлайн аргаар энэ хаягаар [email protected] майн 23 болотор эльгээхэ хэрэгтэй. Майн 25-да эгээл эрхим ажалнууд шэлэн абтажа, энэ жэлдэ арбан дүрбэдэхиеэ эмхидхэгдэхэ «Алтаргана» фестивальда Буряад Ороноо түлөөлжэ ошохо эрхэдэ хүртэхэ.
Энээнһээ гадна уран һайханай талаар 15 конкурс, харалган “Алтарганада” үнгэргэгдэхэ. Хамтадаа 149 номинацида эгээл эрхимүүд шэлэгдэхэ. Мүнөө Буряад Уласай Соёлой яаманай дэргэдэ эмхидхэлэй хороон байгуулагдажа, бэлэдхэл эхилэнхэй. Буряадта хэдэн конкурснуудай шэлэн абалгын шатанууд соносхогдожо, эгээл бэрхэ бэлигтэн элирүүлэгдэнэ. Тэдэнэр ехэ һайн бэлэдхэл хэжэ, эрхим һайнаар Буряад Ороноо уласхоорондын нааданда түлөөлжэ ошохо. Фестиваль июль һарын эсэстэ Забайкалиин хизаарта үнгэрхэ гээд һануулая.