Буряад Уластамнай соёл урлалай шэглэлээр 4 ехэ барилга хэгдэхэнь

• Урдамнай 4 ехэ барилга түсэблэгдэнхэй. Бэшүүр нютагта хүүгэдэй урлалай һургуулиин байшан, Улаан-Үдэ хотодо Иван Голдобиной нэрэмжэтэ музей-бууса ба «Үльгэр» театр һэльбэн шэнэлэлгэ, тиихэдэ «Байгал» театрай байшан барилга болоно, - гэжэ Буряад Уласай барилгын сайдай орлогшо Дмитрий Кобунов дуулгана.

Удаан хүлеэгдэһэн «Байгал» театрай ордон 2 жэлэй туршада баригдахаар түсэблэгдэнэ. Тэрэ Үдэ болон Сэлэнгэ мүрэнүүдэй уулзуур дээрэ баригдаха юм.

• Бүхыдөө 36 барилгада 4,3 миллиард түхэриг гаргашалха ёһотойбди, - гэжэ Буряадай Засагай газарай Капитальна барилгын хүтэлбэриин түрүүлэгшэ Анатолий Урбанов хэлэнэ.

Буряадай соёл урлалай хүгжэлтэдэ ехэ хубита оруулжа байдаг үндэһэтэнэй дуу хатарай «Байгал» театр одоошье өөрын гэртэй болохонь.