«Байгалай долгинуудай» ойн баяр

Эды олон жэлнүүдэй хугасаада хэды олон залуу хүбүүд басагад талаан бэлигээ мүлирүүлжэ гарааб даа. Багшын мэргэжэл шудалха үедөө уран һайханда эльгэлжэ, түмэн харагшадай зүрхэ сэдьхэлдэ сэсэг тарижа шадаһан оюутад саашадаашье энэ харгыһаа холодоогүй ёһотой. Эдир залуу, согтой залитай наһандаа «Байгалай долгинуудай» дулаахан дүхэригтэ уулзажа, танилсажа нүхэсэһэн хүбүүд басагад наһан соогоо тэрэ нүхэсэлөө нангинаар абажа ябанад. Оюутан ябаһан хаһадаа «Байгалай долгинуудта» дууладаг, холо ойгуур гастрольдо ябажа, тоглолто үгэдэг байһанаа «Буряад үнэн» Хэблэлэй байшанай ветеран Николай Бадмаринчинов һанан дурсан, түрэл сонинойнгоо хуудаһанда урдахи дугаарта бэшэһэн байна. Түрэл ансамблиингаа ойн баярай үдэшэдэ хүрэжэ ерэһэн айлшад «Байгалай долгинуудай» тоглолто хаража һууха үедөө өөрынгөө һанаанда эдир залуу наһандаа дахин-дахин эрьен бусажа, нангин мэдэрэлдэ абтаа ёһотой. Тиигэншьегүй яахаб даа! Энээхэн юртэмсэ дэлхэй дээрэ эгээл жаргалтай үедөө түрэл шуулгандаа сугларжа, эхин дуранай амтатайхан мэдэрэлдэ абтаһан һайхан үе саг хэзээдэшье мартагдахагүй. Оюутан залуушуулай болон бэрхэ багшанарай нэгэтэ зохёон байгуулһан шуулганай саашанхи харгынь арюун һайхан байхань болтогой!