«Хүүгэн Баатар»-Лопсон Цыбиков

- Би хадаа хурдан түргэн ухаатай, хурса мэргэн бодолтой, томоотойхон, долоо наһатай Лопсон гээшэб, - гээд, багахан хүбүүн өөрыгөө мэдүүлээ.

Урдын сагһаа эхитэй баараа гарбалтай Хубараг элинсэг хулинсагһаа эхилээд, долоон үе тооложо, харагшадые, шүүгшэдые гайхуулаа гэхэдэ, алдуу болохогүй. Лопсон болбол Соном Дугаровай нэрэмжэтэ Бурэнголой дунда һургуулиин 1-дэхи классай шаби юм.

- Һургуулида һурахада, гоё байна. Үзэглэлтэй танилсаабди, тооложо һуранхайбди. Гэрэйнгээ даабари эжытэеэ хэдэгби, заримдаа өөрөө хэжэрхидэгби. Физкультурын хэшээлдэ ябаха дуратайб. Заримдаа барилдаанда ошодогби, - гэжэ Лопсон Цыбиков хэлэнэ.

 Иимэ томо хэмжээ ябуулгада анха түрүүшынхиеэ хабаадажа, ехэ тайзан дээрэ гараһан байна. Ахын аймаг соогоо “Хүүгэн баатар” гэһэн нэрэ зэргэдэ хүртэжэ, түрэл нютагаа Улаан-Үдэдэ түлөөлхэ эрхэдэ хүртөө.

- Өөрлиг дээрэ нэгэ зааха айгаад абааб, үгэнүүдээ мартан алдааб. Мүн Улаан-Үдэдэ нэгэшье һанаагаа зобонгүй, үреэлнүүдээ һайнаар хэлээб, дуугаа дуулааб. Үшөө тиихэдэ ооһортой ниидэдэг стакантай фокус харуулааб. Минии эжы энээндэ намайе һургаа, мүнөө гурбан фокус мэдэхэ болонхойб. Улаан-Үдэдэ гоё байна, тэндэ “Пионер” гэһэн түбтэ орожо, ехээр һонирхожо наадааб, - гэжэ Лопсон хүбүүхэн хөөрэбэ.

Эхин классай багша Сарюна Александровна Дугарова, буряад хэлэнэй багша Туяна Валерьевна Шарастепанова, Буянто Доржиевич, Наталья Александровна түрэлхидынь хүбүүгээ тулалдаанда һайса бэлдэһэн байна. Ахын аймагһаа уг гарбалтай уран гартан Владимир Табитуев нютагайнгаа аза талаантай, бэлигтэй хүбүүндэ гол шан барюулаа.