Эрхим дуушад, хатаршад

“Планета талантов” хадаа үхибүүдэй уран һайханай зохёохы ажаябуулгые дэмжэлгын болон хүгжөөлгын бүхэроссиин жаса болоно. Ород гүрэнэй Соёлой яамантай хамта хэдэн хотонуудта ехэ-ехэ  урилдаануудые эмхидхэдэг заншалтай. Москва, Екатеринбург, Санкт-Петербург, Казань, Эрхүү болон 50 гаран хотодо эмхидхэгдэһэн урилдаануудые жаса дэмжэнэ гээд хэлэлтэй. 2023 оной январь һарада Улаан-Үдэдэ “На крыльях таланта” гэһэн конкурс жасын туһаламжаар эмхидхэгдэхээр хараалагдана.

Эрхүү хотодо болоһон мүрысөөндэ ганса Эрхүүгэй можын аймагуудай, хотонуудай түлөөлэгшэд хабаадаа бэшэ, мүн Красноярска хизаарай, Буряад Уласай, Үбэр Байгалай хизаарай эдиршүүл оролсоһон байна.

Хатарай бүлэгтэ Гран-при гол шанда Өөрлигэй “Уулын сууряан” хүртэһэн байна. Ансамблиин гэшүүд “Элшэрэй домог” болон “Басагадай хатар” харагшадта, шүүгшэдтэ дурадхаа. Найруулагша - Тамара Борбуева.

Улаан-Үдэ хотын 25-дахи һургуулиин шабинар мүн лэ хатарай бүлгэмүүдэй мүрысөөндэ шалгараа. “Шаг вперёд” гэһэн студи наһанай гурбан бүлэгтэ урилдаанда хабаадаад, дүрбэ дахин 1-дэхи шатын  дипломдо хүртөө. Тэдэ 2-дохи шатын диплом нэгэ дахин абаа. Энэл һуралсалай гуламтын “Сюрприз” гэһэн хатарай студи 2-дохи шатын дипломоор шагнагдаа.

Ахын аймагай үхибүүд ганса хатархаараа бүхы сугларагшадые гайхуулаа бэшэ, мүн дуу хангюурдажа түрүүлһэн байна. Эржена Зандеева 9-12 наһатай хүүгэдэй дунда хубиин тоосоондо 1-дэхи шатын диплом абаа. Нарана Цыбикова энэ бүлэгтэ 2-дохи һуури эзэлээ. Эжыдээ зорюулһан дуунуудые тэдэ дурадхаһан байна. Хажуугаарнь “Что меня ждёт?”, “Быть человеком” гэжэ дуунуудые хангюурдаа. Эдэ хоёр басагад хоюулаа дуулажа, 1-дэхи шатын дипломдо хүртөө. “Аха нютаг” болон “Мир детям” гэһэн дуунуудынь шүүгшэдые ехэтэ һонирхуулаа. Аза талаантай, бэлиг ехэтэй эдир дуушадые Оюна Будажапова бэлдэһэн байна.

Улаан-Үдэ хотын 25-дахи һургуулиин шабинар Кира Улаханова болон Дарья Бельская гэгшэд өөрын наһанай бүлэгүүдтэ шангай 3-дахи һуури эзэлээ.

Шалгарһан эдир дуушад, хатаршадта үшөө ехэ амжалта туйлахыень хүсэе!