Шэнэ зүжэг

Театрай уран найруулагша Валентина Базаровагай энэ зүжэг шэлэжэ абаһаниинь гайхалгүй. Юуб гэхэдэ, эндэ харуулагдаһан ажабайдалай үйлэ хэрэгүүд харагшадта тон дүтэ байжа, ехэ һонирхол татаа. Нарайлалгын  гэртэ болоһон ушар олоной зүрхэ сэдьхэл хүдэлгөө гэхэдэ алдуугүй.

Наталья Актинова, Дарима Шагдурова, Екатерина Ангархаева, Бэлигма Цырендоржиева, Чимита Шагдурова, Сэсэгма Мандалуева, Инга Хусаева, Эльвира Шалдушкеева, Ванда Якшеева гэгшэд шадамар бэрхээр зүжэгтэ наадаһан байна. Оксана Окунева бултаниие гоёожо, нюур шарайень заһажа, тайзан дээрэ гаргаа гээд хэлэхэ хэрэгтэй. Зүжэгтэ наадагшад ганса соёлой һалбарида хүдэлдэг бэшэ, харин элдэб мэргэжэлтэй гээшэ. Хэды тиигэбэшье, харуулагдаһан орёо онсо байдалые һайханаар, ажабайдалда тон дүтөөр харуулжа шадаа. Нарай үхибүүгээ орхёод ошохомни гэһэн залуу басагые һая түрэһэн эхэнэрнүүдэй аргадахада, сугларагшадай нюдэнһөөнь эжэлүүдгүй нулимса гоожоо.

“Үлгын дуун” гэһэн зүжэглэмэл зохёол татаар угтай Туфан  Миннуллин бэшэһэн юм. Энэ мэдээжэ уран зохёолшоной гуурһан дороһоо олон тоото зүжэгүүд гараһан байна. Олон бүтээлнүүдыень Буряадтаа суутай зүжэгшэн Владимир Ильич Кондратьев оршуулан, найруулан табиһан габьяатай.

Түнхэнэй аймагта арадай театр урагшатай хүгжэжэ байһандань баярламаар. Юуб гэхэдэ, 1980-яад онуудай һүүл багаар, 1990-ээд онуудай эхеэр Хужар һууринай “Мүнхэ Бадар” гэһэн арадай театр хэдэн зүжэгүүдые бэлдэжэ, уласайнгаа олон нютагуудаар харуулжа, үндэр сэгнэлтэдэ хүртэһэн юм.