2446
Сэлэнгын аймагай Гусиноозёрск хотодо хониной шэрүүн нооһо үйлэдбэрилхэ цех ажаллажа эхилбэ. «Темник» гэһэн хүдөө үйлэдбэриин нэгэдэл энэ хэрэг өөр дээрээ даажа абаад, ябуулжа байна. Шэнээр байгуулагдаһан энэ цех дотор 10 хүн хүдэлхэдөө, нэгэ үдэрэй туршада 200 килограмм нооһо сэбэрлэнэ. Энэ үйлэдбэридэ хэһээлтэ амасажа байһан эрхэтэд ажаллана. Тэдэнэй хүдэлжэ олоһон салингынь хуули хазагайруулһанай түлөө тохогдоһон ялаяа хушана.
Энэ үйлэдбэриин ажал бэшэнһээ онсо илгаатай. Ушарынь гэхэдэ, нооһо сэбэрлэхэдээ, тэдэнэр хуурай арга хэрэглэжэ хүдэлнэд. Тиихэлээрээ байгаалида харша химиин бодосуудые огто хэрэглэнэгүй.
Үйлэдбэриин захиргаан нютагай хонишодтой нягта харилсаатайгаар ажаллахаһаа гадна, хүршэ Зэдын, Хяагтын, Мухар-Шэбэрэй аймагуудһаа хониной нооһо худалдажа абахаар хэлсэнхэй. Эндэ бүтээгдэһэн шэрдэгүүд барилгын, авиациин болон машина бүтээлгын һалбарида хэрэглэгдэхэ юм.
Автор: Булат БАДМАЕВ
