«Алас Дурнын гектар» абаһаар

Гүрэнэй программа Алас Дурна зүгтэ ниигэмэй болон экономическа талаар ажабайдал һайжаруулха зорилготой. 2016 оной май һарада абтаһан хуули XXI зуун жэлэй эгээл шухала бодолгонуудай нэгэн болоно. Энээн ту­хай Алас Дурна болон Арктика хүгжөөлгын сайд Алексей Чекунков тэмдэ­глээ:

Энэ миин үгэнүүд бэшэ. Манай гүрэндэ энэ ажал 500 шахуу жэлэй тур­шада ябуулагдаа. Мүнөө ажабайдалнай эрид хубилаа. «Алас Дурнын гек­тар» тухай бүхы дэлхэй мэдэнэ. Мүнөөдэрэй байдалаар, тойрогой 100 мян­га гаран хүн газар абаад байна.

Буряад Уласта 1407 хүн түлөөһэгүй газараа хайшан гэжэ хэрэглэхэ байһанаа элирүүлээ. Тэдэнэй 42 хубинь гэр бариха, 48 хубинь хүдөөгэй ажал ябуулха, 10 хубинь олзын хэрэгэй ба аяншалгын түсэлнүүдые бэелүүлхэ зорилготой. Мүнөөдэр 109 участок дээрэ ажал ябуулагдана, ха­рин 25 хүн газараа уридшалан, үмсын зөөри болгоо.

Россиин Юрэнхылэгшын 2023 оной июниин 6-ай захирамжаар «Алас Дурнын гектар» сэрэгэй тусхай операцида хабаадагшадта, тэдэнэй гэр бүлын гэшүүдтэ үгтэжэ эхилээ. Тарбагатайн аймагай СВО-до хабаадагша­да гэр бариха газар эндэ һая үгтэбэ.

Газар абаха дуратай эрхэтэд надальнийвосток.рф гэһэн электрон хая­гаар Росреестр, МФЦ руу мэдүүлгэ бариха аргатай. Гадна саарһа дансану­удаа өөрөө асарха эрхэтэй, үгы гэбэл, шууданаар эльгээжэ болоно.