«Гайхамшагта Байгал» гэһэн хүрэнгэжүүлгын түсэл Россиин Засагай газарай дэмжэлтэдэ хүртөө

Оросой Холбоото Уласай Засагай газар 2030 он болотор гүрэнэй 51 можо нютагта 200 шахуу зошод буудалай, хадын санаар курортнуудай, аквапаркнуудай, сэнгэлгын сэсэрлигүүдэй барилга нэмэлтэ мүнгэн зөөрёор дэмжэхэ. Буряад Уласай «Гайхамшагта Байгал» гэһэн түсэл конкурсын дүнгөөр «Аяншалга ба хүндэмүүшэ аяг» гэһэн үндэһэтэнэй түсэлэй хэмжээндэ хүнгэлэлтэтэй урьһаламжа абаха аргатай болобо. Түсэл «Байгалай гавань» гэһэн тусхай экономическа зуруудта бэелүүлэгдэнэ.

Горячинск һууринда баригдаха «Гайхамшагта Байгал» гэһэн зошод буудалнуудай комплекс Россиин Эдэй засагай яаманай 2025 ондо дэмжэһэн 170 түсэлэй тоодо ороо.

Хүрэнгэжүүлгын «Гайхамшагта Байгал» түсэлдэ халуун аршаантай  СПА-түб, үхибүүдэй тамирай түб, мотоклуб, амаралгын зурууд, этно-хүдөө һуурин, зүүн зүгэй эмнэлгын клиникэ, тамирай уһанай янзануудай түб, тамирай ба бэеэ сэнгүүлхэ олон үүргэтэ комплекс, театрай ба циркын аренэ ороно. Түсэбэй ёһоор түсэл бэелүүлгэдэ 44,3 млрд түхэригэй хүрэнгэ шэглүүлэгдэхээр хараалагдана.

"Бидэ аяншалгын талаар һайн шанартай дурадхал оруулнабди, тус дурадхал эрилтэтэй байхань дамжаггүй. Айлшад олоор ерэхэ, ажалай һууринууд байгуулагдаха, олзо оршо ба татабари мүн байха. Россиин Засагай газарай Түрүүлэгшэ Михаил Владимирович Мишустинда аяншалгын һалбарида түрүү түсэлнүүдые бэелүүлхэ арга олгоһондонь баяр хүргэнэб, - гэжэ Буряад Уласай Толгойлогшо Алексей Цыденов тэмдэглээ.