Буряад Уласта аяншалгын һалбарида хүдэлхэ мэргэжэлтэдые бэлдэхээр түсэблэнэ

Буряад орон руу аяншалагшад олоор ябадаг боложо, аяншалгын һалбари хангаха ажахы байгуулагдана. Тиимэһээ энэ һалбарида хүдэлхэ мэргэжэлтэд хэрэгтэй болоно гээд эли. Буряад ороной аяншалгын һалбарида хүдэлхэ мэргэжэлтэдэй дуталдаһан ушараар элдэб хэмжээнүүд абтана. Энээн тухай мартын 26-да үнгэргэгдэһэн пресс-клуб дээрэ Буряад Уласай Аяншалгын сайд Алдар Доржиев мэдээсэбэ.

«Аяншалга ба хүндэмүүшэ аягай индустри» гэжэ үндэһэтэнэй түсэлэй хэмжээндэ Москва, Санкт-Петербург ба Казань хотонуудта мэргэжэлтэдые бэлдэхэ түбүүд байгуулагдаа. Аяншалгын һалбарида хүдэлдэг зон эндэ мэргэжэлээ дээшэлүүлхэ болоно.

- Мүнөөдэрэй байдалаар түбүүдэй ажал улам эршэдэнэ. Захиргаануудай, олзын хэрэгэй, аяншалгын һалбариин түлөөлэгшэдһөө бүридэһэн нютаг можонуудай команданууд түбүүдэй база дээрэ һуралсал гарана. Үнгэрэгшэ жэлдэ 20 хүн Казань хотын түбтэ һураһан байна. Мүнөө жэлдэ Москвагай ба Санкт-Петербургын түбүүдһээ урилга ерээ, - гэжэ Аяншалгын сайд Алдар Доржиев хөөрэбэ.

 Түсэлэй бэлдэлгэ тухай Алдар Доржиев мүн мэдээсэбэ. Түсэлэй хэмжээндэ хүрэнгэ шэглүүлэгшын ба оюутанай хоорондо хэлсээн баталагдаха, хүрэнгэ шэглүүлэгшэ стипенди түлэхэ, харин оюутан һуралсалай удаа тэрэнэй компанида ажаллаха ёһотой.

 Мүнөө Буряад Уласта болбосоролой найман эмхи аяншалгын һалбарида хүдэлхэ мэргэжэлтэдые бэлдэнэ.

- Байгалай аяншалгын ба сервисэй колледж тогоошоной мэргэжэлдэ һургадаг түбүүдэй нэгэн болоно. Тэрэнэй бааза дээрэ элдэб хэмжээ ябуулганууд таһалгаряагүй эмхидхэгдэдэг. Колледж дүүргэгшэд Буряад Уласта, бэшэшье нютаг можонуудта эрилтэ ехэтэй, - гэжэ сайд тэмдэглээ.