116
Wildberries & Russ (РВБ) Буряад Уласта «Ургалтын платформа» ябуулба
Wildberries & Russ (РВБ) гэһэн нэгэдэмэл компани, Стратегическа үүсхэлнүүдэй Агентство (АСИ) үмсын хэрэг эрхилэгшэдые дэмжэхэ «Ургалтын платформа» программа Буряад Уласта бэелүүлжэ эхилбэ. Энээн тухай үнгэрһэн долоон хоногто РВБ-н гүйсэдхэхы захирал Роберт Мирзоян Буряадай Толгойлогшо Алексей Цыденовтэй уулзахадаа дуулгаба.
Түсэлэй түрүүшын шатада Буряад Уласай 30 бренд хабаадажа, маркетплейсын шухала эрдэм мэдэсын болон шэнжэлэлгын шухаг зэбсэгүүдтэй ба рекламна каналнуудтай танилсаха.
«Ургалтын платформа» гэһэн түсэлэй команда эндэ һая Улаан-Үдын олзын хэрэг эрхилэгшэдтэй уулзаба. Түсэлэй хүтэлбэрилэгшэ Юлия Полетаева эд бараанай үзэсхэлэн хаража, программын булюу шанар тухай хөөрэбэ. «Ургалтын платформа» Россиин 8 нютаг можодо эхи абаа, тэрэ тоодо Волгоградай, Новгородой ба Рязаниин можонуудта. Үнгэрһэн жэлтэй сасуулбал, түсэлдэ хабаадагшад программын ашаар 60 хубяар ехэ эд бараа худалдаа.
– Буряад Уласай дэбисхэр дээрэ иимэ түсэлэй эхилһэндэ баяртайбди. Манай олзын хэрэг эрхилэгшэд продукцияа худалдаха талаар маркетплейс эдэбхитэйгээр хэрэглэдэг, тиин шэнэ эрдэм мэдэсэтэй болохо хүсэлтэй байһаниинь гайхалгүй. Буряадай компанинуудай эд бараа СНГ-н гүрэнүүдтэ худалдажа абадаг, тэрэнь эрилтэтэй, харин наймаа абагшад һайн харюунуудые үгэдэг. Wildberries & Russ (РВБ) гэжэ нэгэдэмэл компани, Стратегическа үүсхэлнүүдэй Агентство (АСИ) манай олзын хэрэг эрхилэгшэдтэ туһа хүргэжэ байһандань баярланабди, - гэжэ Буряад Уласай Толгойлогшо Алексей Цыденов хэлэбэ.
Тоо оньһоной платформонууд дотоодын валова продукт байгуулгада тэмдэглэмээр һуури эзэлдэг, гүрэнэй экономикын хүгжэлтэдэ ехэ хубитаяа оруулдаг гэжэ РВБ-н гүйсэдхэхы захирал Роберт Мирзоян тэмдэглээ.
– РВБ холбоото уласай болон уласхоорондын хэмжээндэ гараха арга боломжо олгоно. Буряадай олзын хэрэг эрхилэгшэдэй Wildberries дээрэ худалдаа наймаанай хэмжээн 2024 оной дүнгөөр 51 хубяар дээшэлээ. «Ургалтын платформа» гэжэ программа нютаг можын олзын хэрэг хүгжөөлгэдэ шэнэ ами оруулха, илангаяа бага ба дунда олзын хэрэгтэ,- гэжэ Роберт Мирзоян онсолбо.
«Ургалтын платформа» Россиин нютаг можонуудта олзын хэрэг эдэбхижүүлхэ, Росси дотор үйлэдбэрилэгдэһэн продукциин хэмжээ ехэ болгохо, гүрэнэй олзын хэрэгтэ тааруу зохид эрхэ нүхэсэл байгуулгада анхарал татаха зорилготой. 2024 оной декабрь һарада Wildberries & Russ (РВБ) гэжэ нэгэдэмэл компани, Стратегическа үүсхэлнүүдэй Агентство (АСИ) түсэл бэелүүлжэ эхилээ. 2025 оной январь һарада тус программатай Россиин Юрэнхылэгшэ Владимир Путин танилсаһан байна.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
